ఆర్ఆర్ఆర్ మూవీకి గుమ్మడి కాయ కొట్టిన రాజమౌళి
హైదరాబాద్, 
దర్శకధీరుడు రాజమౌళి ఎంతో ప్రతిష్టాత్మాకంగా తెరకెక్కిస్తున్న సినిమా ఆర్ఆర్ఆర్. ఈ సినిమాలో మెగా పవర్ స్టార్ రామ్ చరణ్, జూనియర్ ఎన్టీఆర్ ప్రధాన పాత్రలలో నటిస్తుండడంతో ఈ మూవీ గురించి అభిమానులు వేయి కళ్లతో ఎదురు చూస్తున్నారు. ఇందులో రామ్ చరణ్ అల్లూరి సీతారామరాజు పాత్రలో.. ఎన్టీఆర్ కొమురం భీమ్ పాత్రలో కనిపించబోతున్నారు. ఇప్పటికే ఈ మూవీ నుంచి విడుదలైన పోస్టర్స్, ఇంట్రడ్యూసింగ్ వీడియోస్, ప్రమోషన్ సాంగ్ సోషల్ మీడియాలో రికార్డ్స్ క్రియేట్ చేస్తున్నాయి. ఇద్దరు స్టార్ హీరోలను ఒకేసారి స్క్రీన్ పై చూసేందుకు అభిమానులు ఆసక్తిగా ఎదురుచూస్తున్నారు. ఈ క్రమంలోనే ఆర్ఆర్ఆర్ మూవీని అక్టోబర్ 13న విడుదల చేయబోతున్నట్లుగా గతంలోనే ప్రకటించింది చిత్రయూనిట్. అయితే ఇప్పటికే కరోనా ఫస్ట్ వేవ్, సెకండ్ వేవ్ కారణంగా ఈ మూవీ షూటింగ్ పలుమార్లు వాయిదా పడుతూ వచ్చిన సంగతి తెలిసిందే.ఇదిలా ఉంటే.. ఆర్ఆర్ఆర్ సినిమా షూటింగ్ ఎట్టకేలకు పూర్తైంది. ఈ విషయాన్ని చిత్రయూనిట్ తన ట్విట్టర్ ఖాతా ద్వారా తెలియజేసింది. కొన్ని పికప్ షాట్స్ మినహా మిగతా షూట్ పూర్తి చేశాము. పొస్ట్ ప్రొడక్షన్ పనులు వేగంగా జరుగుతున్నాయి. 2018 నవంబర్ 19న ప్రారంభించిన అదే బైక్ షాట్‏తో అనుకోకుండా ఈరోజు ఆర్ఆర్ఆర్ షూటింగ్ పూర్తైంది అంటూ ట్వీట్ చేసింది చిత్రయూనిట్. ఈ సినిమా అప్‏డేట్స్ త్వరలోనే ఇవ్వబోతున్నట్లుగా ఆర్ఆర్ఆర్ టీం తెలిపింది.  ఇందులో బాలీవుడ్ బ్యూటీ అలియా భట్, ఒలివియా మోరీస్ హీరోయిన్లుగా నటిస్తుండగా…  శ్రియా శరణ్, అజయ్ దేవ్‏గన్‏లు కీలక పాత్రలలో నటించారు. చరణ్, తారక్‏కు సంబంధించిన సాంగ్ షూట్ కోసం ఇటీవల వీరిద్దరితోపాటు చిత్రయూనిట్ మొత్తం ఉక్రెయిన్ వెళ్లిన సంగతి తెలిసిందే.