విశాఖపట్నం
సింహాద్రి అప్పన్న స్వామి సన్నిధిలో స్వాతి నక్షత్ర సుదర్శన నారసింహ హోమాన్ని ఘనంగా నిర్వహించారు. ఇందులో భాగంగా వేకువజామునే స్వామిని సుప్రభాత సేవతో మేల్కొలిపి ప్రభాత ఆరాధనలు పూర్తిచేశారు. సుదర్శన పెరుమాళ్ను ప్రత్యేక పల్లకిలో కళ్యాణ మంపంలోని ప్రత్యేక వేదికపై ఉంచి మండపారాధన, కలశారాధనలు చేశారు.పాల్గొన్న భక్తుల గోత్రనామాలతో నృసింహ అష్టోత్తర శతనామార్చనలు చేసి అగ్నిప్రతిష్టాపన గావించారు. పంచసూక్తాలు, నృసింహ, సుదర్శన గాయత్రీ మంత్రాలతో ప్రత్యేక హవనం చేసి పూర్ణాహుతి చేశారు. పాల్గొన్న భక్తులకు వేదాశీర్వచనాలు, శేషవస్త్రాలను, తీర్థ ప్రసాదాలను అందజేశారు.