.jpg)
పెగాసెస్ పై ఆదేశాలిస్తాం : సుప్రీం
న్యూఢిల్లీ, సెప్టెంబర 13,
పెగాసస్ హ్యాకింగ్ వ్యవహారంపై స్వతంత్ర దర్యాప్తు జరపాలంటూ దాఖలైన పిటిసన్లపై సుప్రీంకోర్టులో సోమవారం విచారణ జరిగింది. ఈ సందర్భంగా దేశ భద్రతకు సంబంధించిన అంశాలను చర్చించడం మంచిది కాదన్న ఉద్దేశంతోనే పెగాసస్ వ్యవహారంపై తాము సవివరంగా అఫిడవిట్‌ దాఖలు చేయడం లేదని కేంద్రం తెలిపింది. అయితే, ఈ ఆరోపణలపై దర్యాప్తునకు నిపుణుల కమిటీ ఏర్పాటుకు సిద్ధంగా ఉన్నట్లు కేంద్రం తరఫున సొలిసిటర్‌ జనరల్‌ తుషార్‌ మెహతా కోర్టుకు తెలిపారు.దీంతో కేంద్రం వివరణపై ప్రధాన న్యాయమూర్తి జస్టిస్ ఎన్వీ రమణ నేతృత్వంలోని ధర్మాసనం తీవ్ర అసంతృప్తి వ్యక్తం చేసింది. తాము దేశ భద్రత, శాంతిభద్రతల అంశాల్లోకి వెళ్లడం లేదని, రక్షణ వంటి విషయాలపై వివరాలు అడగడం లేదని సీజేఐ అన్నారు. కేంద్రం పదేపదే అవే అంశాలను ప్రస్తావిస్తోందని, పెగాసస్ వ్యవహారంపై అందరూ ఎంతో ఆసక్తిగా ఎదురుచూస్తున్నారని వ్యాఖ్యానించారు. పౌరుల హక్కుల ఉల్లంఘన జరిగిందో లేదో స్పష్టం చేస్తే చాలని, గోప్యతా హక్కుల ఉల్లంఘన ఆరోపణలకే పరిమితం కావాలని పేర్కొంది.‘‘పెగాసస్ వ్యవహారం అత్యంత ముఖ్యమైందే.. అయితే ఓ సాఫ్ట్‌వేర్‌ను ప్రభుత్వం ఉపయోగించిందా లేదా అన్నది బహిరంగంగా చర్చించే అంశం కాదు.. దేశ భద్రతను దృష్టిలో ఉంచుకునే ఈ సమాచారాన్ని అఫిడవిట్‌లో పేర్కొనలేదు.. కాబట్టి దీనిపై ఇప్పటికే సమర్పించిన అఫిడవిట్‌ సరిపోతుంది.. దేశ భద్రతకు సంబంధించిన విషయాలను బహిర్గతం చేయలేమని ప్రభుత్వం ఇప్పటికే స్పష్టం చేసింది.. పెగాసస్ ఆరోపణలపై దర్యాప్తునకు నిపుణుల కమిటీని ఏర్పాటు చేస్తాం.. ఆ కమిటీ అన్ని ఆరోపణలను పరిగణలోకి తీసుకుంటుంది. అన్నీ పరిశీలించి కోర్టుకు నివేదిస్తుంది’’ అని సొలిసిటర్‌ జనరల్‌ తెలిపారు.‘‘పెగాసస్ అంశం అందరూ ఆసక్తిగా ఎదురుచూస్తున్న విషయం.. పౌరుల హక్కుల ఉల్లంఘన జరిగిందో లేదో స్పష్టం చేస్తే చాలు.. ఇందులో గోప్యతా హక్కుల ఉల్లంఘన ఆరోపణలకే పరిమితం కావాలి.. దీనిపై ఒక ప్రకటన చేయడానికి ప్రభుత్వానికి అవకాశమిచ్చాం. కారణం ఏదైనా అందుకు కేంద్రం ఇష్టపడట్లేదు.. దీనిపై ఎలాంటి ఉత్తర్వులు ఇవ్వాలో ఆలోచించి నిర్ణయం తీసుకుంటాం’’ అని చీఫ్‌ జస్టిస్ రమణ స్పష్టం చేశారు. మరో రెండు మూడు రోజుల్లో నిర్ణయం వెల్లడిస్తామని తీర్పును రిజర్వులో ఉంచింది.ఒకవేళ ఈ రెండు మూడు రోజుల్లో అఫిడ్‌విట్ విషయంలో కేంద్ర ప్రభుత్వం తన వైఖరి మార్చుకుంటే కోర్టును సంప్రదించాలని సూచించింది. కిందటసారి కూడా జాతీయ భద్రత, దేశ రక్షణ ప్రభావితం చేసే విధంగా జోక్యం చేసుకోబోమని స్పష్టం చేశాం.. ఇక్కడ వ్యక్తిగత ఫోన్‌లు హ్యాక్ చేశారని ఆరోపణలు ఉన్నాయి.. ఈ విషయమే మేం అడిగాం.. కాబట్టి హ్యాకింగ్ జరిగిందా? లేదా? అనేది అఫిడవిట్‌ దాఖలు చేయండి’ అని జస్టిస్ సూర్యకాంత్ అన్నారు. కేవలం వ్యక్తిగత ఫోన్‌ల హ్యాకింగ్ అంశం గురించే మాట్లాడుతున్నామని వ్యాఖ్యానించారు