పుట్టపర్తిలో వైకాపా సంబురాలు
అనంతపురం
అనంతపురం జిల్లా పుట్టపర్తి నియోజకవర్గం లో ఆరు జడ్పీటీసీలు, 61 ఎంపీటీసీ స్థానాలు కైవసం చేసుకున్న సందర్భంగా ఎమ్మెల్యే శ్రీధర్ రెడ్డి క్యాంపు కార్యాలయంలో నాయకులు, కార్యకర్తలు సంబరాలు చేసుకున్నారు. నియోజకవర్గంలోని అన్ని మండలాలకు చెందిన నాయకులు క్యాంపు కార్యాలయంలో ఎమ్మెల్యేను కలిసి శుభాకాంక్షలు తెలిపారు. ఈ సందర్భంగా ఎమ్మెల్యే శ్రీధర్ రెడ్డి మాట్లాడుతూ రాష్ట్రంలో  ముఖ్యమంత్రి వైఎస్ జగన్ మోహన్ రెడ్డి అమలు చేస్తున్న  సంక్షేమ పాలనకు జెడ్పిటిసీ, ఎంపీటీసీ ఎన్నికల ఫలితాలే నిదర్శనమన్నారు.రాష్ట్రంలో టీడీపీ తుడిచిపెట్టుకొని పోవడం ఖాయమని 2024 లో  వైసీపీ మరింత మెరుగైన ఫలితాలు సాధించి అధికారంలోకి వస్తుందని ధీమా వ్యక్తం చేశారు.ఇదే సందర్భంలో మాజీ సీఎం చంద్రబాబు నాయుడు గురించి మాట్లాడుతూ ప్రజలు ఎంతగా బుద్ధి చెబుతున్నా చంద్రబాబుకు జ్ఞానోదయం కాలేదని ఆయనకు జ్ఞానోదయం అయ్యేలోపు కాలం తీరి పోతాడని సంచలన వ్యాఖ్యలు చేశారు.ఆ వెంటనే గొంతు సవరించుకుని బహుశా చంద్రబాబునాయుడు వందేళ్లు బతకొచ్చని అన్ని ఏళ్ళు బతికినా ఆయన ఇక జన్మలో సీఎం కాలేడన్నారు.డాక్టర్ వైఎస్ఆర్ ఆశయాలను సాధిస్తూ ప్రజా సంక్షేమ పాలన ఎలా ఉంటుందో సీఎం జగన్ ఆచరణలో అమలు చేస్తున్నారని కొనియాడారు. వైసిపి ఇచ్చిన ప్రతి హామీని కి కట్టుబడి పాలన సాగిస్తుందని అందులో ఎటువంటి అపోహలు వద్దన్నారు. ఉనికిని చాటుకోవడానికి టిడిపి అభూత కల్పనలు సృష్టిస్తూ ప్రజలను మోసం చేస్తోందన్నారు. ఏదేమైనా వైసిపికి ఇంతటి ఘనవిజయం అందించి మరింత బాగా పాలన సాగించేందుకు సహకరించిన ప్రజలకు కృతజ్ఞతలు తెలిపారు.పార్టీలో పదవులు రాని వారు అధైర్య పడొద్దని ప్రతి ఒక్కరికీ పార్టీలో సముచిత స్థానం కల్పిస్తానని ఎమ్మేల్యే పేర్కొన్నారు.