మెదక్, నవంబర్ 16,
సిద్దిపేట కలెక్టర్‌‌గా స్వచ్ఛంద పదవీ విరమణ చేసిన పి.వెంకట్రామరెడ్డికి తెలంగాణ ముఖ్యమంత్రి కేసీఆర్ బంపరాఫర్ ఇచ్చారు. అఖిల భారత పరిపాలన సర్వీసుల తాను విరమించుకుంటున్నట్లు ప్రభుత్వ ప్రధాన కార్యదర్శి సోమేశ్‌కుమార్‌కు ఆయన సోమవారం దరఖాస్తు చేసుకోగా.. దాన్ని వెంటనే ఆమోదిస్తూ ప్రభుత్వం ఉత్తర్వులు జారీచేసింది. మంగళవారం ప్రకటించిన ఎమ్మెల్యే కోటాలో ఎమ్మెల్సీ అభ్యర్థిగా టీఆర్ఎస్ ఆయనకు ఛాన్స్ ఇచ్చింది. దీంతో మిగిలిన అభ్యర్థులతో పాటు వెంకట్రామరెడ్డి నామినేషన్ దాఖలు చేశారు.వెంకట్రామరెడ్డి స్వస్థలం పెద్దపల్లి జిల్లా ఓదెల మండలం ఇందుర్తి గ్రామం. 1996లో గ్రూప్‌-1 అధికారిగా ఎంపికైన ఆయన మచిలీపట్నం, చిత్తూరు, తిరుపతిలలో ఆర్డీవోగా పనిచేశారు. 2007లో ఐఏఎస్‌ హోదా పొంది... మెదక్‌లో డ్వామా పీడీగా, హుడా సెక్రటరీగా, జీహెచ్‌ఎంసీ జోనల్‌ కమిషనర్‌గా పనిచేశారు. తెలంగాణ ఆవిర్భావం ప్రభుత్వం కొత్త జిల్లాలను ఏర్పాటు చేయడంతో సంగారెడ్డి, సిద్దిపేట కలెక్టర్‌గా బాధ్యతలు నిర్వర్తించారు. వచ్చే ఏడాది సెప్టెంబరు వరకు సర్వీసు ఉన్నప్పటికీ సీఎం కేసీఆర్ ఇచ్చిన ఆఫర్‌తో ఆయన కలెక్టర్ పదవికి రాజీనామా చేశారు.జిల్లా కలెక్టర్‌గా ఉన్నప్పటికీ వెంకట్రామిరెడ్డి కొంతకాలంగా రాష్ట్ర ప్రభుత్వానికి అనుకూలంగా బహిరంగంగానే వ్యాఖ్యలు చేస్తూ హాట్‌టాపిక్‌గా మారారు. దీంతో ఆయన టీఆర్ఎస్‌లో చేరనున్నారంటూ ప్రచారం జరుగుతోంది. ఈ నేపథ్యంలోనే 2018లో మల్కాజిగిరి లోక్‌సభ, 2020లో దుబ్బాక ఉప ఎన్నిక సందర్భంగానూ ఆయన పేరును టీఆర్ఎస్ అధిష్ఠానం పరిశీలించింది. చివరికి ఎమ్మెల్యే కోటాలో ఆయన్ని ఎమ్మెల్సీగా శాసనమండలికి పంపాలని నిర్ణయించింది.కలెక్టర్‌ ఉద్యోగానికి రాజీనామా అనంతరం వెంకట్రామిరెడ్డి మాట్లాడుతూ... ‘తెలంగాణ రావడం ఒక అదృష్టం. కొట్లాడి తెచ్చుకున్న తెలంగాణను సీఎం కేసీఆర్‌ అన్ని రకాలుగా అభివృద్ధి చేస్తూ దేశంలోనే అగ్రస్థానంలో నిలిపారు. రానున్న వందేళ్లు ప్రజలు చెప్పుకొనేలా.. దేశం మొత్తం చూసేలా రాష్ట్రాన్ని తీర్చిదిద్దుతున్నారు. ముఖ్యమంత్రి స్ఫూర్తి, దార్శనికత నన్ను ఎంతో ప్రభావితం చేశాయి. టీఆర్ఎస్‌లో చేరి అభివృద్ధి పనుల్లో పాలుపంచుకునేందుకే వీఆర్‌ఎస్‌ నిర్ణయం తీసుకున్నాను. కేసీఆర్‌ ఏ పదవి ఇచ్చినా స్వీకరించి కష్టపడి పనిచేస్తా’ అని తెలిపారు.