తిరుపతి, నవంబర్ 29,
ఆంధ్రప్రదేశ్ రాజకీయాల్లో జూనియర్ ఎన్టీఆర్  వ్యవహారం రచ్చ లేపుతోంది. ముఖ్యంగా తెలుగు దేశం పార్టీలో ఈ వ్యవహారం కాకరేపుతోంది. ఈ రచ్చలో నేరుగా జూనియర్ ప్రమేయం లేకపోయినా ఏదో ఒక రకంగా ఆయన వార్తల్లో ఉంటున్నారు. ఇప్పట్లో తాను పొలిటికల్ ఎంట్రీ ఇచ్చేది లేదని కొన్నాళ్ల క్రితం జూనియర్ ఎన్టీఆర్ తేల్చి చెప్పినా ఆయన ఫ్యాన్స్ మాత్రం తగ్గడం లేదు. తెలుగు దేశం పార్టీ అధినేత చంద్రబాబునాయుడు నుంచి ఆ పార్టీ నేతలు ఎవరు నియోజకవర్గాలకు వెళ్లినా జూనియర్ ఎన్టీఆర్ ప్రస్తావన లేకుండా ముగియడం లేదు. తాజాగా, ఏపీ అసెంబ్లీలో నారా భువనేశ్వరిపై అనుచిత వ్యాఖ్యలు చేశారంటూ చంద్రబాబు నాయుడు మీడియా సమావేశంలో వెక్కి వెక్కి ఏడ్చిన విషయం తెలిసిందే. దీంతో చంద్రబాబు కుటుంబానికి భారీగా మద్దతు లభించింది. జూనియర్ ఎన్టీఆర్ సైతం స్పందించారు. అయితే, జూనియర్ స్పందన సరిగా లేదంటూ టీడీపీ ముఖ్యనాయకులే ఆయనను టార్గెట్ చేశారుఅప్పటి నుంచి మళ్లీ ఎన్టీఆర్ పేరు మారుమోగుతోంది. చంద్రబాబు ట్రాప్‌లో జూనియర్ ఎన్టీఆర్ పడ్డారంటూ వైసీపీ నేతలు విమర్శలు చేశారు. ఇటు టీడీపీ నేతలు మాత్రం వైసీపీకి ఎన్టీఆర్ భయపడుతున్నారని సంచలన కామెంట్స్ చేశారు. అత్తకు అన్యాయం జరిగితే ఆయన ప్రవచనాలు చెప్పడం ఏంటని ప్రశ్నించారు. ఈ క్రమంలో, జూనియర్ ఎన్టీఆర్‌కు ఆయన అభిమానులు కొండంత అండగా నిలబడ్డారు. ఏకంగా టీడీపీ అధినేత చంద్రబాబునాయుడునే టార్గెట్ చేశారు. సోషల్ మీడియా వేదికగా టీడీపీకి కౌంటర్లు ఇచ్చారు. అయినా కూడా ఆ వేడి చల్లారలేదు. తాజాగా, కుప్పంలో చంద్రబాబుకు జూనియర్ ఎన్టీఆర్ అభిమానులు ఊహించని షాకిచ్చారు. కాబోయే సీఎం జూనియర్ ఎన్టీఆర్ అంటూ నినాదాలు చేశారు. ఆయన్ను సీఎంగా చూడడమే తమ లక్ష్యం అంటూ ఎన్టీఆర్ ఫ్లెక్సీలు.. జెండాలు పట్టుకొని డ్యాన్సులు వేశారు.. బాణాసంచా కాల్చి సందడి చేశారు. కుప్పంలో జై లవకుశ స్పెషల్ షో ఏర్పాటు చేసిన అభిమానులు.. ఈ సందర్భంగా కాబోయే సీఎం ఎన్టీఆర్ అంటూ నినాదాలు చేశారు. ప్రస్తుతం ఈ వీడియోలు సోషల్ మీడియాలో వైరల్‌గా మారాయి. చంద్రబాబు కంచుకోటగా భావించే కుప్పంలోనే ఇలాంటి పరిస్థితి నెలకొడటం తీవ్ర చర్చనీయాంశంగా మారింది.