విశాఖపట్టణం, డిసెంబర్ 24,
మత్స్యకారులు యథావిథిగా చేపల కోసం వల విసిరారు. నీటిలో పడిన వలను లాగేందుకు చాలా బరువుగా అనిపించింది. మత్స్యకారులు అందరూ కలిసి పైకి లాగారు. అంతే దాన్ని చూసి అందరూ ఒక్కసారిగా ఆశ్చర్యానికి గురయ్యారు. వలలో చిక్కింది మాములు చేప కాదు.. ప్రపంచంలోనే అతిపెద్దది..! అవును బుధవారం విశాఖ సాగర తీరానికి ప్రపంలోనే అతి పెద్ద చేప వేల్ షార్క్ వచ్చింది.తంతడి బీచ్‌లో చేపల కోసం వల వేసిన మత్స్యకారులకు ఈ భారీ చేప చిక్కింది. ఈ చేప బరువు 50 అడుగుల పొడవు, 2 టన్నుల బరువు ఉంది. ఈ చేపను గమనించిన వైల్డ్‌ లైఫ్‌ ఫొటోగ్రాఫర్‌ శ్రీకాంత్‌ మన్నెపూరి అధికారులు అటవీ శాఖ అధికారులకు సమాచారం ఇచ్చారు. విశాఖ డీఎఫ్‌వో అనంత్‌శంకర్‌ ఆదేశాలతో సిబ్బంది వెంటనే తంతడి బీచ్‌కు చేరుకున్నారు.తంతడి బీచ్ వద్ద ఉన్న భారీ చేపను పరిశీలించిన వారు.. ఇది ప్రపంచంలోనే అతి పెద్ద చేప వేల్‌షార్క్ అని తెలిపారు. ప్రస్తుతం ఈ జాతి అంతరించిపోతుందని చెప్పారు. ఈ భారీ చేపను సముద్రంలోకి సురక్షితంగా వదిలిపెట్టాలని డీఎఫ్‌వో అనంత్‌శంకర్‌ సూచించారు. వెంటనే అటవీ శాఖ సిబ్బంది, మత్స్యకారులు, వన్యప్రాణుల సంరక్షకులు షార్క్‌కు ఫిల్టర్‌ ఫీడింగ్‌ ఇచ్చారు. అనంతరం షార్క్‌ను సురక్షితంగా సముద్రంలోకి వదిలిపెట్టారు.