విశాఖపట్టణం, డిసెంబర్ 29,
విశాఖపట్నం పోర్ట్ ట్రస్ట్ అరుదైన రికార్డును సొంతం చేసుకుంది. ఒకే రోజులో వైజాగ్ పోర్ట్ ట్రస్ట్‌లో అత్యధిక సరుకును హ్యాండిల్ చేసి ఆ ఘనతను సాధించింది. ఈ నెల 26వ తేదీన ఒక్క రోజులో రికార్డు స్ధాయిలో విశాఖపట్నం పోర్టు కార్గోను హ్యాండిల్ చేసి ఈ ఘనతను సాధించింది. ఇన్నర్ హార్బర్, అవుటర్ హార్బర్, ఎస్‌పీఎం నుంచి 3,70,029 మెట్రిక్ టన్నుల సరుకును హ్యాండిల్ చేయడం ద్వారా ఒక్కరోజులో అత్యధిక సరుకును హ్యాండిల్ చేసి రికార్డ్ సృష్టించింది. 26వ తేదీన పోర్టు కు వచ్చిన 21 నౌకల ద్వారా ఈ సరుకును హ్యాండిల్ చేశారు.2019లో పోర్టు సాధించిన 3,47,722 మెట్రిక్ టన్నుల కార్గో హ్యాండ్లింగ్ ఇప్పటి వరకూ పోర్టు ఒక్క రోజులో హ్యాండిల్ చేసిన సరుకు రికార్డులలో ఉంది. తాజాగా ఈ ఘనతను పోర్టు అధిగమించింది. 2019 డిసెంబర్ 2న 19 నౌకల నుంచి 3,47,722 మెట్రిక్ టన్నులు సరుకును హ్యాండిల్ చేసింది.ప్రస్తుతం ఈ రికార్డును అధిగమించి విశాఖపట్నం పోర్ట్ ట్రస్ట్ నూతన రికార్డును నెలకొల్పడంతో పోర్టు చైర్మన్ కె.రామమోహనరావు సంతృప్తి వ్యక్తం చేశారు. ఈ ఘనతను సాధించిన ట్రాఫిక్ డిపార్ట్మెంట్, సిబ్బందిని పోర్టు ట్రస్ట్ చైర్మన్ అభినందించారు. భవిష్యత్తులో మరిన్ని రికార్డులు సాధించి పోర్టు అభివృద్ధికి నిరంతం కృషి చేయాలని అభిలషించారు.