విజయవాడ, జనవరి 24,
సంక్రాంతి పండుగ సందర్భంగా ప్రత్యేక బస్సులు నడిపిన ఆంధ్రప్రదేశ్ రాష్ట్ర రోడ్డు రవాణా సంస్థ కు కళ్లు చెదిరే ఆదాయం లభించింది. రికార్డు స్థాయిలో ఆదాయం సాధించింది. 12 రోజుల్లో ఏకంగా రూ. 144 కోట్ల మేర ఆదాయం లభించింది. ఈ మేరకు ఏపీఎస్ ఆర్టీసీ మేనేజింగ్ డైరెక్టర్ (ఎండీ) ద్వారకా తిరుమలరావు శుక్రవారం ఓ ప్రకటన విడుదల చేశారు. భోగి, సంక్రాంతి, కనుమ పర్వదినం సందర్భంగా ఏపీఎస్ ఆర్టీసీ బస్సుల్లో ప్రయాణించిన ప్రయాణికులకు ఎండీ ధన్యవాదాలు తెలిపారు.సంక్రాంతి సీజన్లో ఆర్టీసీకి రూ.144 కోట్ల లాభాలు వచ్చినట్లు ఎండీ ద్వారకా తిరమలరావు తెలిపారు. జనవరి 7 నుంచి 18వ తేదీవరకు బస్సులను నడిపినందు వల్లే ఈ లాభాలు సాధించినట్లు ఆయన వెల్లడించారు.సంక్రాంతికి ఏపీలోని అన్ని ప్రాంతాల నుంచి హైదరాబాద్, బెంగుళూరు, చెన్నై, విజయవాడ, విశాఖపట్నం, అమలాపురం, రాజమండ్రి, పాలకొండ, భీమవరం, కనిగిరి, గుడివాడ, మాచర్ల, నెల్లూరు, చిత్తూరు, పులివెందుల, నంద్యాల, కదిరి పట్టణాలకు 5,422 ప్రత్యేక బస్సులు నడిపినట్లు ద్వారకా తిరుమలరావు వివరించారు.ఇప్పటి వరకు సుమారు 1,350 బస్సులు ఆంధ్రప్రదేశ్‌ నుంచి హైదరాబాద్‌కు నడపగా.. 4,072 బస్సుల్ని రాష్ట్రంలోని దూర ప్రాంతాలు, జిల్లా కేంద్రాలు, అన్ని ముఖ్యమైన పట్టణాలకు బస్సులు నడిపినట్లు ద్వారకా తిరుమలరావు తెలిపారు. జనవరి 17న అత్యధిక సంఖ్యలో 36 లక్షల మంది ప్రయాణికులు ప్రయాణించడం వల్ల రూ. 15.40 కోట్ల అత్యధిక ఆదాయం వచ్చాయన్నారు.పొరుగు రాష్ట్రాలలోని విద్యా సంస్థలకు జనవరి 31వ తేదీ వరకు సెలవులు పొడిగించినందున ప్రయాణికుల అవసరాల మేరకు ప్రతి రోజూ అన్ని జిల్లా కేంద్రాల నుంచి ఇతర రాష్ట్రాలకు తగినన్ని బస్సులు ఏర్పాటు చేసినట్లు ఆర్టీసీ తెలిపింది. అయితే చెన్నై, బెంగుళూరుల నుంచి కోవిడ్ థర్డ్ వేవ్ కారణంగా ప్రయాణికుల సంఖ్య భారీగా తగ్గినట్లు వివరించారు.ఈ బస్సులన్నింటిల్లో ట్రాకింగ్ సదుపాయం కల్పించినందున, 24x7 కాల్ సెంటర్ సేవల ద్వారా ప్రయాణికులకు ఎటువంటి ఇబ్బంది కలుగకుండా, కోవిడ్ నిబంధనలు పాటిస్తూ వారి గమ్యస్థానములకు సకాలంలో సురక్షితముగా చేరవేస్తునట్లు ద్వారకా తిరుమలరావు తెలిపారు.