ప్రముఖ స్వాతంత్ర సమరయోధుడు, జై ఆంధ్ర ఉద్యమంలో కీలక పాత్ర పోషించిన కాకాని వెంకటరత్నం విగ్రహం తొలగింపు విజయవాడలో ఉద్రిక్తతకు దారి తీసింది. తమ అనుమతి లేకుండా కాకాని విగ్రహాన్ని తొలగించారని నిరసిస్తూ ఆయన కుటుంబ సభ్యులతోపాటు వైసీపీ, కాంగ్రెస్ పార్టీలు ఆందోళనకు దిగాయి. బెంజి సర్కిల్ వద్ద ఫ్లైఓవర్ పనులకు అడ్డంకిగా ఉండటంతోనే విగ్రహం తొలగించాల్సి వచ్చిందని, పనులు పూర్తయ్యాక తిరిగి యథాతథంగా ప్రతిష్ఠిస్తామని అధికార పార్టీ నేతలు స్పష్టం చేశారు. కృష్ణావాసులకు సుపరిచితమైన కాకాని వెంకటరత్నం గురించి తెలియని వారు ఉండరు. కృష్ణా జిల్లాలోని అకునూరులో జన్మించిన కాకాని, జాతీయోద్యమంలో మహాత్మాగాంధీతోపాటు పాల్గొని విద్యార్ధి నాయకుడిగా అలుపెరగని పోరాటం చేశారు. జై ఆంధ్ర ఉద్యమంలో కీలకంగా వ్యవహరించిన ఆయన పోరాటం చేస్తూనే కన్నుమూశారు. ఆయన చేసిన సేవలకు గుర్తింపుగా నాటి ప్రభుత్వం బెజవాడలోని అత్యంత కీలకమైన బెంజి సర్కిల్‌లో కాకాని విగ్రహాన్ని ప్రతిష్ఠిచింది. బెంజి సర్కిల్‌లో పై వంతెన నిర్మాణానికి ప్రతిపాదనలు చేసిన ప్రభుత్వం, పనులు సైతం ప్రారంభించింది. వంతెనకు పిల్లర్లు నిర్మాణం పూర్తైనా బెంజి సర్కిల్ వద్ద మాత్రం ఇంకా పనులు చేపట్టలేదు. ఈ పనులకు కాకాని వెంకటరత్నం విగ్రహం అడ్డమొస్తుందని, దీన్ని తొలగిస్తేనే పనులు చేపడతామని హైవే అథారిటీ అధికారులు రాష్ట్ర ప్రభుత్వానికి విన్నవించారు. విగ్రహం తొలగించకపోతే పనులు జరగని పరిస్ధితి నెలకోవడంతో దీన్ని తొలగించాలని నిర్ణయించారు. దీనిపై కాకాని వెంకటరత్నం కుటుంబానికి ముందుగానే విషయాన్ని వివరించారు. ముందుజాగ్రత్త చర్యలు చేపట్టిన అధికారులు, భారీగా బలగాలను మొహరించి శనివారం అర్దరాత్రి పొక్లయిన్‌తో విగ్రహ తొలగింపు పనులు ప్రారంభించారు. విషయం తెలుసుకున్న కుటుంబసభ్యులు సహా కాంగ్రెస్, వైకాపా నేతలు అక్కడకు చేరుకుని అడ్డుకున్నారు. దీంతో కొంతసేపు తీవ్ర ఉద్రిక్తత నెలకుంది. పోలీసులు ఆందోళనకారులను అరెస్టు చేసిన అనంతరం విగ్రహాన్ని తొలగించారు. స్టేషన్ నుంచి బయటకు వచ్చిన ఆందోళనకారులు ఉదయం కూడలిలో మరోసారి ఆందోళకు దిగారు. దీంతో ఉద్రిక్తత నెలకోవడంతో పోలీసులు మరోసారి ఆందోళనకారులను అరెస్టు చేశారు.కాకాని వెంకటరత్నం విగ్రహం తొలగింపునకు తాము అనుమతించలేదని ఆయన కుటుంబం సహా అభిమానులు చెబుతున్నారు. అభివృద్ది పేరుతో విగ్రహాలను కూల్చడంపై వైకాపా నేత యలమంచిలి రవి తీవ్ర అభ్యంతరం వ్యక్తం చేశారు. కృష్ణాజిల్లాకు ఎంతో సేవ చేసిన కాకాని విగ్రహాన్ని తొలగించడాన్ని తీవ్రంగా వ్యతిరేకిస్తున్నట్లు తెలిపారు. మరోవైపు రాజకీయ పార్టీలు సహా కాకాని వెంకటరత్నం కుటుంబం చేస్తోన్న ఆరోపణలను అధికార పార్టీ సభ్యులు ఖండించారు. కుటుంబ సభ్యులకు పరిస్ధితిని వివరించి వారి అంగీకారంతోనే విగ్రహాన్ని తొలగించామని, దీనిపై వైకాపా నేతలు రాజకీయం చేయడం తగదని అన్నారు. అర్ధరాత్రి బెంజి సర్కిల్ వద్ద కాకాని విగ్రహం తొలగింపు విషయంలో ఆందోళన చేసిన మాజీ ఎమ్మెల్యే, వైసీపీ నేత యలమంచిలి రవితో పాటు పలువురిని పోలీసులు ఆరెస్టు చేశారు. అనంతరం వారిని గన్నవరం తరలించి అక్కడ నుంచి ఉంగుటూరు స్టేషన్‌కి తరలించారు.