విజయవాడ, మార్చి 21,
సోడా కొట్టు నుంచి షోకేజ్ షోరూమ్‌ల వరకూ అన్నీ డిజిటల్ మయమయ్యాయి. పేమెంట్ ప్రతీదీ ఇప్పుడు ఆన్‌లైనే.. మొత్తం డిజిటల్ మనీనే. ఎక్కడ చూసినా స్కాన్ చేయడం.. స్వైప్ చేయడమే.. ఇప్పుడిట్ల ట్రెండ్ అదే నడుస్తుంది. ప్రజలు డిజిటల్‌కి అంతలా అలవాటు పడిపోయారు. దీంతో ఆర్టీసీ కూడా లేటెస్ట్ ట్రెండ్‌ని ఫాలో అవుతుంది. బస్సుల్లో కూడా డిజిటల్ చెల్లింపులు స్వీకరించేందుకు రూట్ సిద్ధం చేస్తోంది.కార్గో సేవలతో మంచి సక్సెస్ మీదున్న ఏపీఎస్ ఆర్టీసీ.. తాజాగా డిజిటల్ బాటలోకి కూడా అడుగులు వేస్తోంది. బస్సుల్లో టికెట్లు కొనుగోలు చేసే ప్రయాణికుల నుంచి ఇప్పటివరకు క్యాష్ రూపంలో వసూలు చేసిన ఆర్టీసీ.. ఇకపై డిజిటల్ చెల్లింపులకు కూడా అవకాశం కల్పించాలని ఆలోచిస్తోంది. దీని కోసమే యూనిఫైడ్ టికెటింగ్ సిస్టం (యూటీఎస్)ను ప్రవేశపెట్టనుంది.యూటీఎస్ కోసం ఆర్టీసీ ఇప్పటికే టెండర్లు కూడా నిర్వహించింది. మొత్తం 8 కంపెనీలు బిడ్లు దాఖలు చేస్తే.. వాటిల్లో అభి బస్ సంస్థ టెండర్‌ను దక్కించుకుని కాంట్రాక్ట్‌ను ఖరారు చేసుకుంది. యూటీఎస్‌తో కేవలం డిజిటల్ పేమెంట్ ఒక్కటే కాదు.. ఆ నంబర్ ఆధారంగా మన లైవ్ లొకేషన్ చూసుకోవడం, ఆన్‌లైన్‌లో ముందుగా బుక్ చేసుకోవడం ఇలాంటివన్నీ డెవలప్ చేస్తున్నారు. ఈ యూటీఎస్‌ను రెడీ చేసి.. మొట్టమొదటి సారిగా కృష్ణా, పశ్చిమ గోదావరి జిల్లాల్లో ఈ విధానాన్ని అమలు చేయనున్నారు.ఇప్పటివరకు ఆర్టీసీలో టికెట్స్ కోసం ఉపయోగించిన టిమ్స్ స్థానంలో యూటీఎస్‌తో డెవలప్ చేసిన ఈ-పాస్ మెషిన్లు ప్రవేశపెడతారు. మనం టికెట్ తీసుకున్న తర్వాత.. క్యాష్ కాకుండా డెబిట్, క్రెడిట్ కార్డులు, ఫోన్ పే, గూగుల్ పే వంటి డిజిటల్ చెల్లింపులు ద్వారా అమౌంట్ చెల్లించొచ్చు. అదేవిధంగా ముందుగా టికెట్ల బుకింగ్‌లు, బస్‌పాస్‌లు, కొరియర్ సేవలు, పార్సిల్ బుకింగ్‌లకూ కూడా అవకాశం కల్పిస్తారు. మరో ఆర్నెలల్లో ఈ సేవలు అందుబాటులోకి రానున్నట్లు ఆర్టీసీ అధికారులు చెబుతున్నారు.