అనూహ్య వాతావరణం ఉత్తరాదిని వణికిస్తోంది. దేశ రాజధాని ఢిల్లీలో గాలివాన మరోసారి బీభత్సం సృష్టించింది. బుధవారం  ఉదయం ఢిల్లీలో భారీ స్థాయిలో గాలివాన వచ్చింది. పెనుగాలులకు నగరంలోని కొన్ని ప్రాంతాలు వణికిపోయాయి. అనూహ్య వాతావరణ పరిస్థితులు జనజీవనాన్ని స్తంభింపచేశాయి. ప్రజలు చిగురుటాకులా వణికిపోయారు. గత నాలుగు రోజుల్లో ఢిల్లీలో సృష్టించడం ఇది రెండోసారి. ఆదివారం (మే 13) ఢిల్లీ పరిసర ప్రాంతాల్లో భారీ గాలివాన అల్లకల్లోలం సృష్టించిన విషయం తెలిసిందే. మరోవైపు.. ఢిల్లీతో పాటు సమీప ప్రాంతాల్లో ఇదే రకమైన వాతావరణం ఉంటుందని భారత వాతావారణ శాఖ (ఐఎండీ) హెచ్చరించింది. బుధవారం సాయంత్రం పిడుగులతో కూడిన వర్షం కురిసే ప్రమాదం ఉందని వెల్లడించింది.భారీ హోర్డింగులు, విద్యుత్ స్తంభాలు, టెలిఫోన్ లైన్ల వద్ద ఎవరూ ఉండరాదని ప్రజలకు హెచ్చరికలు జారీ చేశారు. అల్వార్, రోహ్‌తక్, జింద్, భివాని, జాజర్, రెవారి, నుహ్, పల్వాల్ ప్రాంతాల్లో పిడుగులతో కూడిన వర్షం పడే ప్రమాదం ఉందని నేషనల్ డిజాస్టర్ మేనేజ్‌మెంట్ అథారిటీ తన ట్విట్టర్ అకౌంట్ ద్వారా ప్రజలకు వార్నింగ్ ఇచ్చింది