రాజమండ్రి, మే 9,
ఓ ఆర్టీసీ డ్రైవర్‌కు వచ్చిన అద్భుతమైన ఆలోచన ఇది. చెప్పడానికి చిన్న ఐడియా అయినా సరే.. రోడ్డు ప్రమాదాలను నివారించేందుకు ఉపయోగపడుతోంది. కోనసీమ జిల్లా కపిలేశ్వరపురానికి చెందిన సత్యనారాయఱాజు రావులపాలెం ఆర్టీసీ డిపోలో డ్రైవర్. సాధారణంగా వాహనాలకు కుడి, ఎడమ వైపు అద్దాలు ఉంటాయి. వీటి ద్వారా వెనుక నుంచి వచ్చే వాహనాలను గుర్తించొచ్చు. వీటిని గమనిస్తూ డ్రైవింగ్ చేస్తూ జాగ్రత్త వహిస్తాం. కానీ బస్సు డ్రైవర్‌ల విషయానికి వస్తే.. బస్సు ఎదురుగా ఐదు అడుగుల వరకూ కనిపించని పరిస్థితి.కొన్ని సందర్భాల్లో డిపోలు, బస్టాపుల్లో ఆగినప్పుడు బస్సు ముందు వైపు నుంచి ప్రయాణికులు అటూ, ఇటూ తిరుగుతుంటారు. ఒక్కో సమయంలో జనాలు కనిపించక, ఎవరూ లేరనుకుని బస్సు ముందుకు పోనించడంతో ప్రమాదాలు జరుగుతున్నాయి. కొన్ని ఘటనల్లో ప్రాణాలు పోయిన సందర్భాలు ఉన్నాయి. రావులపాలెం బస్టాండ్‌లో కూడా ఒకటి, రెండు ప్రమాదాలు జరిగాయి. ఈ ప్రమాదాలను ఎలాగైనా నివారించాలని సత్యనారాయణరాజు భావించారు. అప్పుడే సత్యనారాయణరాజుకు ఓ ఆలోచన వచ్చింది. బస్సుకు ముందు వైపు ఓ స్టీల్ బాల్ పెట్టాలని ప్లాన్ చేశారు. ముందు ప్రయోగాత్మకంగా తీసుకొచ్చి అమర్చారు. ఈ స్టీల్ బాల్ 180 డిగ్రీల కుంభాకారంలో ఉంది.. దానిని డ్రైవర్ సీటుకు కుడివైపు రెండు అడుగుల రాడ్‌కు సెట్ చేశారు. ఈ స్టీల్‌ బాల్‌లో బస్సు ముందు భాగం ఎడమ నుంచి కుడివైపు డ్రైవర్‌ డోర్‌ వరకూ కనిపిస్తోంది.. అంటే బస్సు ముందు వైపు ఎవరైనా ఉన్నా తెలుస్తుంది.ఈ ఐడియాతో ప్రమాదాలకు చెక్ పెట్టొచ్చని సత్యనారాయణరాజు చెబుతున్నారు. ఈ స్టీల్‌ బాల్‌ ఆలోచనపై అధికారులు కూడా ఆలోచన చేస్తున్నారు. అన్ని బస్సులకు అమర్చాలని భావిస్తున్నారట. అంతేకాదు ఒక్కో బాల్ ఖర్చు కూడా రూ.100 మాత్రమేనట. మొత్తానికి తనకు వచ్చిన ఓ వినూత్నమైన ఆలోచనను ఆర్టీసీ అధికారులు, డ్రైవర్లు, కండక్టర్లు అభినందిస్తున్నారు.