గాంధీనగర్, సెప్టెంబర్ 28, 
దేశవ్యాప్తంగా దసరా సంబరాలు మొదలైపోయాయి. నవరాత్రి వేడుకలు జరుగుతున్నాయి. అయితే వివిధ రాష్ట్రాల్లో.. వివధ రకాలుగా ఈ పండుగను జరుపుకుంటుంటారు. దానికి సంబంధించి ప్రత్యేక కథలు, కథనాలు కూడా వినికిడిలో ఉన్నాయి. కొన్ని ఆచారాలు వింతగానూ కూడా ఉంటాయి. గుజరాత్‌లో కూడా ఓ వింత సంప్రదాయం ఉంది. కొన్నేళ్లుగా అది ఆనవాయితీగా వస్తూ ఉంది. దాని గురించి వింటే.. చాలా ఆశ్చర్యంగా అనిపిస్తుంది. దీని ప్రకారం వేడుకల్లో భాగంగా అక్కడి మగవాళ్లు చీరలు కట్టుకుని.. నృత్యం చేయాలి. సాధారణంగా మగవాళ్లు చీరలు కట్టుకోవడమేమిటని చాలామంది భావిస్తారు.. కానీ ఈ పండుగ దినాల్లో అక్కడి పురుషులు ఇలా అనుకోరు.. కచ్చితంగా దీనిని పాటిస్తారు.తొమ్మిది రోజులు పాటు సాగే ఈ సంబరాల్లో ఇప్పటికే రాష్ట్రంలో చాలాచోట్ల అమ్మవారిని ప్రతిష్టించారు. స్థానిక సంప్రదాయాల ప్రకారం భక్తి శ్రద్ధలతో అమ్మవారిని కొలుచుకుంటున్నారు. ముఖ్యంగా గుజరాత్‌లో గర్భా నృత్యం చాలా పాపులర్. ముఖ్యంగా అహ్మదాబాద్‌లోని పాతబస్తీలో మగవాళ్లు ఈ వేడుకల్లో చీరలు కట్టుకుని గర్భాడ్యాన్స్ చేస్తారు. బరోట్ కమ్యూనిటీకి చెందిన పురుషులు నవరాత్రి వేడుకలలో ఎనిమిదో రోజున ఇలా డ్యాన్స్ చేయడం 200 ఏళ్లుగా సాగుతుంది. దీని వెనుక పెద్ద కథ ఉంది.ఓ మహిళ శాపం నుంచే ఈ ఆచారం పురుడు పోసుకుంది. సదుబా అనే మహిళ .. ఒక పురుషుడి కారణంగా తన బిడ్డను కోల్పోతుంది. దాంతో ఆమె మగవాళ్లు చీరలు కట్టుకుని అమ్మవారి ముందు డ్యాన్స్ చేయాలని శాపం పెట్టింది. దాంతో అక్కడి వారు ఆమె చనిపోయాక సదుబాకు గుడి కట్టించారు. అంతేకాదు ఆ గుడికి వెళ్లే మగవాళ్లు కచ్చితంగా చీరలు కట్టుకునే వెళ్లాలి. అలా అక్కడ పురుషులు వెళ్లి ఆమెకు ప్రార్థన చేసి.. క్షమాపణలు కోరుతుంటారు. ఇది 200 ఏళ్ల క్రితం జరిగిందని చెబుతుంటారు.
అంతేకాదు నవరాత్రుల్లో అష్టమి రోజున.. నగరంలోని బారోట్ కమ్యూనిటికీ చెందిన వందలాది మంది మగవాళ్లు సదుబా మాతను ప్రత్యేకంగా పూజించేందుకు ఒక దగ్గరకు చేరుకుంటారు. వారంతా చీరలు కట్టుకుని.. గర్భా డ్యాన్స్ చేస్తారు. ఈ వింత ఆచారం ప్రతి ఏడాది నవరాత్రుల్లో జరుగుతుంది. ఈ ఆచారాన్ని శేరీ గర్భా అంటుంటారు. దాదాపు 800 మంది ఇందులో పాల్గొంటారు. నవరాత్రులు సెప్టెంబర్ 26న ప్రారంభమై అక్టోబర్ 5న ముగుస్తాయి. కేవలం గుజరాత్‌లోనే కాదు.. మిగతా రాష్ట్రాల్లోని చాలా ప్రాంతాల్లో కూడా ఇలాంటి వినూత్న ఆచారాలు ఉన్నాయి.