విశాఖపట్టణం, జూన్ 20, 
విశాఖ ఎంపీ ఎంవీవీ సత్యనారాయణ ఫ్యామిలీ కిడ్నాప్ వ్యవహారం ఏపీ రాజకీయాల్లో చర్చనీయాంశమైంది. ఈ ఎపిసోడ్ తర్వాత ప్రతిపక్షాలు ప్రభుత్వాన్ని టార్గెట్ చేశాయి.. రాష్ట్రంలో శాంతిభద్రతలు సరిగా లేవని ఆరోపించాయి. అయితే ఈ క్రమంలో ఎంపీ తీసుకున్న నిర్ణయం ఆసక్తికరంగా మారింది. ఇకపై తెలంగాణ, హైదరాబాద్‌లో వ్యాపారాలపై ఫోకస్ పెట్టాలని నిర్ణయించుకున్నారు. విశాఖను వదిలి ఆయన తెలంగాణకు వెళ్ళిపోవాలని భావిస్తున్నారట.రాష్ట్రంలో ఓ వైపు రాజకీయాలు, మరోవైపు వ్యాపారం ఒకేసారి చేయడం కష్టంగా ఉందంటున్నారు సత్యనారాయణ. రాజకీయాలను వ్యాపారాన్ని కలిపేస్తున్నారని ఆవేదన వ్యక్తం చేశారు. తాను రాజకీయాల్లో ఉన్నందున కొందరు తనను టార్గెట్ చేస్తున్నారని.. ఎవరో ఒకరు, ఏదో ఒకటి అంటుంటే బాధగా ఉందంటున్నారు. ప్రజాసేవ కోసం రాజకీయాలు విశాఖలో చేస్తానని.. కానీ వ్యాపారం హైదరాబాద్‌లో చేద్దామన్న నిర్ణయానికి వచ్చినట్లు చెబుతున్నారు. అధికార పార్టీలో ఉండటంతో అసత్య ప్రచారాలు ఎక్కువగా ఉన్నాయన్నారు.డబ్బుల కోసం కిడ్నాప్‌ చేసినంత మాత్రాన ఊరొదిలి పారిపోవడం లేదని.. వ్యాపారాన్ని రాజకీయాలకు ముడిపెట్టి ఎత్తి చూపుతున్నారని.. అందుకే ప్రశాంతంగా ఉంటుందని అక్కడి వెళ్లాలనుకుంటున్నట్లు చెప్పారు. కిడ్నాపర్లకు శిక్ష పడే వరకు న్యాయ పరంగా ఏం చేయాలో అంతా చేస్తాను అన్నారు. విశాఖలో కొత్త ప్రాజెక్టులు చేపట్టనని సత్యనారాయణ అంటున్నారట. తనపై తప్పుడు ప్రచారంతో పార్టీకి కూడా చెడ్డ పేరు వస్తోందని.. అది కూడా ఓ కారణంగా చెప్పారు.టీడీపీ అధినేత చంద్రబాబు కూడా ఇదే అంశాన్ని ప్రస్తావించారు. విశాఖలో ఎంపీ భార్య, కుమారుడిని కిడ్నాప్‌ చేశారని.. అధికార పార్టీ ఎంపీ కుటుంబానికే రక్షణ లేదంటే సామాన్యుల పరిస్థితి ఏంటీ అంటూ టార్గెట్ చేశారు. సాక్షాత్తూ ఎంపీ ఇక్కడ బతకలేను.. హైదరాబాద్‌ వెళ్లిపోతానన్నారంటే పోలీసు వ్యవస్థకు సిగ్గు అనిపించడం లేదా అంటూ ఘాటు వ్యాఖ్యలు చేశారు. ముఖ్యమంత్రి జగన్‌ స్వయంగా పరిపాలనా రాజధానిగా ప్రకటించిన విశాఖను వదిలి అధికార పార్టీ ఎంపీ హైదరాబాద్ వెళ్లిపోతాననడం రాజకీయ వర్గాల్లోనూ చర్చనీయాంశమైంది.విశాఖపట్నం ఎంపీ ఎంవీవీ సత్యనారాయణ ఆయన కుటుంబ సభ్యులు, ఆడిటర్‌ జీవీ (జీ వెంకటేశ్వరరావు) ముఖ్యమంత్రి వైఎస్ జగన్‌మోహన్‌రెడ్డిని కలిశారు. నిందితులు చాలా దారుణంగా వ్యవహరించారని, వారిపై కఠిన చర్యలు తీసుకోవాలని సీఎంను కోరారు. గతవారం ఎంపీ కుమారుడు శరత్‌, భార్య జ్యోతి, ఆడిటర్‌ జీవీలను ఓ గ్యాంగ్ రుషికొండనలోని నివాసం నుంచి కిడ్నాప్ చేశారు. ఈ విషయాలన్నీ వివరించేందుకు వీరంతా ముఖ్యమంత్రి జగన్‌ కలిసింది ఎంపీ సత్యనారాయణ కుటుంబం.