వీడియోకాన్ కేసులో ఐసీఐసీఐ బ్యాంక్ మేనేజింగ్ డైరెక్టర్, సీఈవో చందా కొచ్చర్‌కు ఉచ్చు బిగుస్తోంది. తాజాగా ఆమెకు ఈ కేసులో సెబీ  నుంచి తాఖీదులు అందాయి.    బ్యాంక్ వర్గాలు వెల్లడించాయి. వీడియోకాన్ గ్రూపునకు రుణ మంజూరు వ్యవహారంలో చందా కొచ్చర్‌తో పాటు ఆమె కుటుంబ సభ్యులు ఆరోపణలు ఎదుర్కొంటున్న విషయం తెలిసిందే. చందా కొచ్చర్ 2012లో క్విడ్ ప్రోకో విధానంలో వీడియోకాన్ గ్రూపునకు అక్రమంగా రూ.3,250 కోట్ల రుణాన్ని మంజూరు చేసినట్లు వచ్చిన ఆరోపణలు దేశ వ్యాప్తంగా దుమారం రేపాయి. ఈ వ్యవహారంలో చందా కొచ్చర్‌కు ఐసీఐసీఐ బ్యాంకు బాసటగా నిలవడం గమనార్హం. అయితే.. ఆరోపణల్లో నిజమెంతో నిగ్గు తేల్చడానికి దర్యాప్తు సంస్థలు విచారణ చేపట్టాయి. ఈ వ్యవహారంలో ఆదాయం పన్ను  విభాగం ఇప్పటికే చందా కొచ్చర్ భర్త దీపక్ కొచ్చర్ నడుపుతున్న నూపవర్ రెన్యువబుల్స్ ప్రైవేట్ లిమిటెడ్ అనే పవన విద్యుత్ సంస్థ నుంచి వివరణ కోరింది. సంస్థ ఆదాయంతోపాటు పన్ను చెల్లింపుల వివరాలను అడిగి తీసుకుంది. నూపవర్ సంస్థకు దీపక్ కొచ్చర్ వ్యవస్థాపక సీఈవోగా వ్యవహరిస్తున్నారు. ఐసీఐసీఐ బ్యాంకు నుంచి రూ.3,250 కోట్ల రుణాన్ని పొందిన వీడియోకాన్ గ్రూపు అందుకు ప్రతిఫలంగా నూపవర్ సంస్థకు కొంత మొత్తాన్ని చెల్లించినట్లు ఆరోపణలు వస్తున్నాయి. ఈ ఆరోపణలను ఐసీఐసీఐ బ్యాంకుతో పాటు వీడియోకాన్ గ్రూపు చైర్మన్ వేణుగోపాల్ ధూత్ ఖండించారు. విచారణలో భాగంగా ఐసీఐసీఐ బ్యాంకుకు చెందిన పలువురు అధికారులను సీబీఐ ప్రశ్నించింది. దీంతో పాటు ఈ రుణ లావాదేవీకి సంబంధించిన పత్రాలను కూడా స్వాధీనం చేసుకుంది.