బాలీవుడ్ క్యూట్ బ్యూటీ అలియా భట్, విక్కీ కౌశల్ ప్రధాన పాత్రల్లో నటించిన ‘రాజి’ బాక్సాఫీసు వద్ద దూసుకెళ్తోంది. మే 11న విడుదలైన ఈ చిత్రం రూ.100 కోట్ల క్లబ్‌లో చేరింది. ఈ విషయాన్ని సినీ విశ్లేషకుడు తరణ్‌ ఆదర్శ్‌ తెలిపారు. అలియా భట్ కెరీర్లో రూ.100 కోట్లు రాబట్టిన చిత్రమిది కావడం విశేషం. గతంలో ఆమె నటించిన ‘2 స్టేట్స్‌’, ‘బద్రినాథ్‌ కీ దుల్హనియా’ సినిమాలు రూ.100 కోట్ల క్లబ్‌లో చేరాయి. మేఘనా గుల్జార్ దర్శకత్వంలో తెరకెక్కిన ఈ చిత్రాన్ని జంగ్లీ మూవీస్, కరణ్ జోహార్‌కు చెందిన ధర్మ ప్రొడక్షన్స్ సంయుక్తంగా నిర్మించాయి. 1971 ఇండో-పాక్ యుద్ధం నేపథ్యంలో ఈ సినిమా తెరకెక్కింది. పాకిస్థాన్ ఆర్మీ అధికారిని పెళ్లాడిన ఓ భారత అమ్మాయి మాతృదేశం కోసం గూఢచారిగా ఎలా పని చేసిందనే విషయాన్ని ఈ సినిమాలో దర్శకురాలు అద్భుతంగా చూపించారు. రాజి సినిమా మూడో శుక్రవారం రూ.2.25 కోట్లు, శనివారం రూ.4.20 కోట్లు రాబట్టింది. దేశవ్యాప్తంగా మొత్తం రూ.98.08 కోట్లు వసూలు చేసింది. ఆదివారం ఈ చిత్రం రూ.100 కోట్ల క్లబ్‌లో చేరుతుంద’ని తరణ్ ఆదర్శ్ ట్వీట్ చేశారు. సుమారు రూ.30 కోట్ల వ్యయంతో ఈ చిత్రాన్ని తెరకెక్కించారు. ఈ ఏడాది హిందీలో ఐదు చిత్రాలు రూ.100 కోట్ల మార్క్‌ను చేరుకున్నాయి. జనవరిలో విడుదలైన పద్మావత్, ఫిబ్రవరిలో విడుదలైన సోనూ కే టిటూ కీ స్వీటీ, మార్చిలో విడుదలైన రైడ్, బాఘీ 2 చిత్రాలు వంద కోట్ల క్లబ్‌లో చేరాయి.