తను స్విమ్‌సూట్లో దిగిన ఫొటోలను సోషల్ మీడియా అకౌంట్స్‌లో పోస్టు చేయడంపై వస్తున్న విమర్శల పట్ల ఘాటుగా స్పందించింది నటి మలైకా అరోరా. తన ఇన్‌స్టాగ్రమ్ అకౌంట్లో తరచూ బికినీ ఫొటోలను పోస్టు చేస్తూ ఉంటుంది మలైక. ఈ విషయంలో తాజాగా ఈమెపై విమర్శలు వచ్చాయి. కొంతమంది నెటిజన్లు మలైకా తీరు తప్పుపడుతూ కామెంట్లు పెట్టారు. ఆమె బికినీలో ఫొటోలు దిగడం తప్పు అన్నట్టుగా వీరు క్లాస్ పీకారు. కొందరు ఈమెపై వ్యంగ్యంగా స్పందించారు. దీంతో వారి విషయంలో స్పందించింది మలైక. తన డ్రస్సింగ్ గురించి వ్యంగ్యంగా మాట్లాడుతున్న వారిని ఆమె ఒక ప్రశ్న అడిగింది. తను సముద్రతీరంలో స్నానం చేస్తున్నప్పుడు, సరదాగా ఈత కొడుతున్నప్పుడు బికినీ ధరించాను అని, ఎవరైనా అదే పని చేస్తారని.. అలా స్నానం చేసేటప్పుడు స్విమ్ సూట్‌ గాక మరేం వేసుకోవాలి? అని మలైకా అరోరా ప్రశ్నించింది. ఈ ప్రశ్నకు సమాధానం చెప్పి తన కళ్లు తెరిపించాలని, ఈదేటప్పుడు స్విమ్ సూట్ కాకుండా వేరే ఏం వేసుకోవచ్చో సెలవివ్వాలని నెటిజన్లను ఆమె వ్యంగ్యంగా ప్రశ్నించింది. ఈ విధంగా తనపై వస్తున్న విమర్శలకు సమాధానం ఇచ్చింది మలైక. ఇటీవల భర్త నుంచి విడాకులు పొందిన మలైకా ఆరోర ఇప్పుడు స్పెషల్ సాంగ్స్, స్పెషల్ రోల్స్.. టీవీ రియాలిటీ షోలతో బిజీగా ఉంది. మరోవైపు మ్యాగజైన్ల కవర్ పేజీల కోసం ఫొటో షూట్స్‌ కూడా నిర్వహిస్తూ ఉంది. ఒకవైపు వయసు మీద పడుతున్నా వన్నె తరగని మలైకా గ్లామర్‌ పట్ల అభిమానుల నుంచి ప్రశంసలు వస్తూ ఉన్నాయి