మహానాడు కార్యక్రమాన్ని ముగించుకున్న తెలుగుదేశం పార్టీ అధినేత, ఏపీ ముఖ్యమంత్రి చంద్రబాబు నాయుడు ఇక దీక్షలతో బిజీ అవుతున్నారు. జూన్ రెండో తేదీ నుంచి వరసగా వారం రోజుల పాటు చంద్రబాబు వివిధ జిల్లా కేంద్రాలకు వెళ్లి నవనిర్మాణ దీక్షలు చేపట్టనున్నారు. జూన్ రెండో తేదీన విజయవాడలో బెంజి సర్కిల్‌లో ననిర్మాణ దీక్ష జరగనుంది. ఆ తర్వాత మూడో తేదీన కర్నూలులో జరగనున్న నవనిర్మాణ దీక్షలో చంద్రబాబు నాయుడు పాల్గొంటారు. ఆపై నాలుగున విజయవాడలోనే మళ్లీ నవనిర్మాణ దీక్ష జరగనుంది. ఐదో తేదీన తూర్పుగోదావరి జిల్లా ఏజెన్సీ ప్రాంతంలో ఇదే దీక్ష జరగనుంది. ఆరో తేదీన కడప, ఏడో తేదీన చిత్తూరుల్లో నవనిర్మాణ దీక్షలు సాగుతాయి. ఎనిమిదో తేదీన నెల్లూరులో మహాసంకల్ప బహిరంగ సభ జరగనుంది. ఆ రోజుతో ఈ వరస దీక్షలు ముగుస్తాయి. నవనిర్మాణ దీక్షలు ప్రభుత్వ కార్యక్రమాలుగానే సాగుతాయని తెలుస్తోంది.