టాలీవుడ్‌లో ఎప్పుడెప్పుడా అని ఎదురుచూస్తోన్న సినిమాల్లో రామ్ చరణ్ - బోయపాటి శ్రీను చిత్రం ఒకటి. ఇది రామ్ చరణ్‌కు 12వ చిత్రం. యాక్షన్ ఎంటర్‌టైనర్‌గా తెరకెక్కుతోన్న ఈ సినిమాను డీవీవీ దానయ్య నిర్మిస్తున్నారు. కియారా అద్వానీ హీరోయిన్‌గా నటిస్తోంది. బాలీవుడ్ స్టార్ వివేక్ ఒబెరాయ్, స్నేహా, ఆర్యన్ రాజేష్ కీలక పాత్రలు పోషిస్తున్నారు. ప్రస్తుతం షూటింగ్ దశలో ఉన్న ఈ సినిమా టైటిల్ ఇంకా ఖరారు కాలేదు. ఆ మధ్య చాలా పేర్లు షికార్లు చేసినా దేన్నీ చిత్ర యూనిట్ ఖరారు చేయలేదు. కనీసం వాటిపై స్పందించలేదు. అయితే త్వరలోనే సినిమా టైటిల్‌ను ప్రకటించాలని దర్శక, నిర్మాతలు చూస్తున్నారట. వాస్తవానికి ఈ సినిమా కథ మొత్తం రాయల్ ఫ్యామిలీకి సంబంధించినది కావడంతో ‘రాజమార్తాండ’ అనే టైటిల్‌ను పెట్టాలని ముందు అనుకున్నారట. అయితే ఆ టైటిల్‌ను కాదని ఇప్పుడు ‘జగదేకవీరుడు’ అనే టైటిల్‌ను పెట్టాలని చిత్ర యూనిట్ భావిస్తోందని ఫిల్మ్ నగర్ సమాచారం. చిరంజీవి హీరోగా నటించిన ‘జగదేకవీరుడు అతిలోక సుందరి’ సినిమా ఎంత పెద్ద హిట్టో అందరికీ తెలిసిందే. ఇప్పటికీ ఈ సినిమా టీవీల్లో వస్తే వదిలిపెట్టనివారు ఉండరు. చిరంజీవి ఇంత పెద్ద విజయాన్ని అందించిన టైటిల్ నుంచి రామ్ చరణ్ సినిమా టైటిల్‌ను తీసుకుంటే బాగుంటుందని దర్శక, నిర్మాతలు భావిస్తున్నట్లు తెలుస్తోంది. ‘జగదేకవీరుడు’ అయితే కథకు సరిగ్గా సరిపోతుందని అనుకుంటున్నారట. మరి నిజంగా ఈ టైటిల్‌నే ఖరారు చేస్తారా.. లేక ఇదీ ఒక రూమర్‌గానే మిగిలిపోతుందా? తెలియాలంటే కొద్ది రోజులు ఆగాల్సిందే. కాగా, చిత్ర యూనిట్ ఈ మధ్య బ్యాంకాక్‌లో కీలకమైన షెడ్యూల్‌ను పూర్తిచేసుకుంది. ఫిల్మ్ నగర్ సమాచారం ప్రకారం తరవాతి షెడ్యూల్ జూన్ 12 నుంచి హైదరాబాద్‌లో ప్రారంభం కానుంది. దసరా సందర్భంగా ఈ సినిమాను వెండితెరపైకి తీసుకురావడానికి సన్నాహాలు చేస్తున్నట్లు సమాచారం.