హైదరాబాద్, మార్చి 23,
ప్రభుత్వాన్ని నడపాలంటే ప్రతి శాఖకు ఓ సీనియర్ ఐఏఎస్ అధికారిని ముఖ్యకార్యదర్శిగా నియమిస్తారు. ఆ శాఖకు ఆ అధికారే పూర్తి బాధ్యత వహించాల్సి ఉంటుంది. కొన్ని సందర్భాల్లో ఓ శాఖ అధిపతికి మరోశాఖ అదనపు బాధ్యతలు అప్పగిస్తారు. ఇలా ఒకటి రెండు శాఖల బాధ్యతలు అప్పగిచటం మామూలే. కానీ ఓ అధికారికి ఒకటి కాదు.. రెండు కాదు ఏకంగా ఆరు కీలక బాధ్యతలు అప్పగించారు. సీనియర్ ఐఏఎస్ అధికారి బుర్రా వెంకటేశంకు తెలంగాణ ప్రభుత్వం ఆరు బాధ్యతలను ఇచ్చింది. అందులో కీలకమైన ఎడ్యుకేషన్, బీసీ సంక్షేమ శాఖలలతో పాటు కొత్తగా గవర్నర్ సెక్రటరీగా మరో బాధ్యత అలాట్ చేశారు. తెలంగాణలో కాంగ్రెస్ ప్రభుత్వం కొలువుదీరిన వెంటనే.. విద్యాశాఖ ప్రిన్సిపల్ సెక్రటరీగా బుర్రా వెంకటేశంను నియమించారు. ఈ క్రమంలోనే ఆయనకు బీసీ సంక్షేమ శాఖ ప్రిన్సిపల్ సెక్రటరీగా అదనపు బాధ్యతలు ఇచ్చారు. విద్యాశాఖ సెక్రటరీ బాధ్యతలతో అదే విభాగంలోని మరో మూడు బాధ్యతలనూ సర్కారు అప్పగించింది. కాలేజీ విద్యాశాఖ కమిషనర్‌గా, టెక్నికల్ ఎడ్యుకేషన్ కమిషనర్గా అడిషనల్ బాధ్యతలతో పాటు తెలంగాణ యూనివర్సిటీకి ఇన్‌చార్జ్ వీసీగా కూడా నియమించారు. తాజాగా.. గవర్నర్ ప్రిన్సిపల్ సెక్రటరీగా మరో బాధ్యతను అలాట్ చేశారు. దీంతో ఒక్క ఐఏఎస్ అధికారికి ఆరు బాధ్యతలు అప్పగించినట్లయింది.ఆరు బాధ్యతలను నిర్వర్తిస్తుండటంతో బుర్రా వెంకటేశం చాలా బిజీ అయిపోయారు. సెక్రటేరియెట్లో నిత్యం ఆయన్ను కలిసేందుకు వందలాది మంది విజిటర్స్ వస్తున్నారు. ఈ తాకిడి తట్టుకోలేక ఆయన చాంబర్ ముందు పోలీసులను పెట్టుకోవాల్సిన పరిస్థితి ఏర్పడింది. పలు శాఖలకు ఆయన కీలక ఉన్నతాధికారిగా ఉండటంతో మిగిలిన శాఖలకు కొద్ది సమయమే కేటాయిస్తున్నారు. ఒక్కోసారి అత్యవసర సమావేశాల కారణంగా ఆ కాస్త సమయం కూడా శాఖలకు ఇవ్వలేకపోతున్నారు. దాంతో కీలకమైన నిర్ణయాలు తీసుకోవడంలోనూ ఆలస్యమవుతుందనే విమర్శలు వస్తున్నాయి.1995 ఐఏఎస్‌ బ్యాచ్‌కు చెందిన బుర్రా వెంకటేశం ఆ ఏడాది యూపీఎస్సీ ఫలితాల్లో జాతీయ స్థాయిలో 15వ ర్యాంకు, ఉమ్మడి ఏపీలో మెుదటి ర్యాంకు సాధించాడు. వివిధ జిల్లాలో అడిషనల్ కలెక్టర్‌గా, కలెక్టర్‌గా నిజాయితీగా సమర్థవంతంగా బాధ్యతలు నిర్వర్తించారు. ఉమ్మడి వరంగల్ జిల్లాలో పేద కుటుంబంలో పుట్టి.. ఏడవ ఏటనే తండ్రిని కోల్పోయిన బుర్రా.. ప్రభుత్వ పాఠశాలల్లో చదివి, ట్యూషన్లు చెబుతూ ఎంతో కష్టపడి సివిల్స్ సాధించాడు. 2019లో 'సెల్ఫీ ఆఫ్ సక్సెస్' పేరుతో ఆయన ఇంగ్లీష్‌లో ఓ పుస్తకాన్ని రచించాడు.ఆయన రాసిన ఈ పుస్తకం విడుదలైన ఐదు నెలల కాలంలోనే ప్రపంచవ్యాప్తంగా 42 వేల కాపీలు అమ్ముడై ప్రముఖ ఈ కామర్స్ ఫ్లాట్‌పాం 'అమెజాన్‌'లో టాప్‌ పుస్తకాల్లో ఒకటిగా నిలిచింది. ఈ పుస్తకంపై సినీ నటులు మహేష్ బాబు, ప్రభాస్, వెంకటేష్‌ సహా పలువురు ప్రముఖులు ప్రశంసలు కురిపించారు.