ఆపరేషన్ గరుడ’.. ఇటీవల నటుడు శివాజీ వెలుగులోకి తీసుకువచ్చిన ఈ అంశంపై ఏపీ సీఎం చంద్రబాబు నాయుడు స్పందించడం‌ నేడు హాట్ టాపిక్‌గా మారింది. శనివారం నాడు విజయవాడలో జరిగిన ‘నవ నిర్మాణ దీక్ష’లో భాగంగా చంద్రబాబు నాయడు పలు ఆసక్తికరమైన విషయాలను తెలియజేస్తూ.. కేంద్ర అనుసరిస్తున్న ధోరణి చూస్తుంటే ఇటీవల నటుడు శివాజీ బయటపెట్టిన ‘ఆపరేషన్ గరుడ’ కుట్ర నిజమేనా అన్న సందేహం కలుగుతుందంటూ వ్యాఖ్యానించారు. కాగా రెండు రోజుల క్రితం ఏపీ ఆర్ధిక మంత్రి యనమల రామక్రిష్ణుడు సైతం ఇదే విధమైన అభిప్రాయాన్ని వ్యక్తపరిచారు. ఇంతకీ ఏంటీ ‘ఆపరేషన్ గరుడు’.. ఎందుకు తెలుగుదేశం పార్టీ నేతలు ఈ ఆపరేషన్ గరుడను చూసి పరేషాన్ అవుతున్నారు? ఇందులో ఉన్న కుట్ర ఏమిటి? శివాజీ ఏం చెప్పారు? 

తొలినుండి ప్రత్యేక హోదా విషయంలో తన వాయిస్‌ను గట్టిగా వినిపిస్తున్న సినీ నటుడు శివాజీ అత్యంత ఆసక్తికరమైన, ఆందోళనకరమైన విషయాలను ‘ఆపరేషన్ గరుడ’ పేరుతో బయటపెట్టారు. ఇది ఎలాంటి ఆధారాలు లేని ఊహాగానమే అయినా ఆసక్తికరంగానే ఉంది. 2019 ఎన్నికలను లక్ష్యంగా చేసుకొని.. ఒక జాతీయపార్టీ ఆపరేషన్ ద్రవిడ పేరుతో భారీ విధ్వసం సృష్టించనున్నట్లు వీడియో ప్రజంటేషన్ ఇచ్చారు శివాజీ. ఇందులో దక్షిణాది మొత్తాన్ని ఆక్రమించడానికి, ప్రాంతీయ పార్టీల్ని చెరబట్టడానికి బీజేపీ విధ్వంసకర వ్యూహం సిద్ధం చేసుకుందని తీవ్రమైన అభియోగం మోపారు. ఆపరేషన్ ద్రవిడ అంటే దక్షిణ భారతదేశమని.. దక్షిణాదిన ఉన్న కీలక రాష్ట్రాల్లో పాగా వేయటమే ఈ ఆపరేషన్ లక్ష్యంగా పేర్కొన్నారు. 2019 ఎన్నికలే ధ్యేయంగా కమలదళం అధ్యక్షుడు అమిత్ షా ఆపరేషన్ ‘ద్రవిడ’ పేరుతో స్కెచ్ గీసుకున్నారని, ఇప్పుడు ఆ పని మీదే ముమ్మరంగా యాక్షన్ ప్లాన్ అమలవుతోందని చెప్పుకొచ్చారు. ఈ విధ్వంస రచన కోసం రూ. 4,800 కోట్లు ఖర్చు పెట్టడానికి బీజేపీ హైకమాండ్ సిద్ధంగా ఉందంటున్నారు. ఈ విషయం తనకు 2017 సెప్టెంబర్‌లోనే తెలిసిందని, తన వద్ద పక్కా ఆధారాలున్నాయంటున్నారు శివాజీ. ఇక రానున్న ఎన్నికల్లో ఈ జాతీయపార్టీ వ్యూహం ఏంటి అన్నదానిపై ఫుల్ క్లారిటీ ఇచ్చారు శివాజీ. ముందుగా అధికార టీడీపీ పార్టీకి వీలైనంత నష్టం చేకూర్చోలే విధ్వంసం సృష్టించి.. ఆ పార్టీకి అడ్రస్‌ లేకుండా చేసి మిగతా పార్టీలను మచ్చిక చేసుకుని చివరి నిమిషంలో అందులో ఒక పార్టీ నాయకుడ్ని జైలుకి పంపి.. మిగిలిన యువ నాయకుడికి కేంద్రమంత్రి ఆశ చూపిస్తారన్నారు. ఫైనల్‌గా బీజేపీకే చెందిన సీనియర్ నాయకుడైన తెలుగువాడిని సీఎం కుర్చీ ఎక్కిస్తారంటూ జోస్యం చెప్పుకొచ్చారు శివాజీ. అయితే ఇందులో ఎక్కడా పార్టీ నాయకుల పేరును ప్రస్తావించలేదు. మొత్తానికి నటుడు శివాజీ చెప్పిన ఆపరేషన్ ద్రవిడ రాజకీయ వర్గాల్లో హాట్ టాపిక్ కాగా.. ఆధారాలు లేకుండా చేసిన ఆరోపణలు విశ్వసనీయతకు నోచుకోలేవు అని రాజకీయ వర్గాల నుండి వినిపిస్తున్నమాట. అయితే కొంతకాలం బీజేపీతో పాటు జర్నీ చేసిన శివాజీ తన వద్ద ఎలాంటి సమాచారం లేకుండా ఇలాంటి సంచలన విషయాలు బహిర్గతం చేస్తారా? అంటూ సందేహాలు వ్యక్త మవుతున్న నేపధ్యంలో చంద్రబాబు ఈ అంశాన్ని ప్రస్తావించడం ఆసక్తిగా మారింది. ఇదిలాఉంటే.. అసలు శివాజీ అనే వ్యక్తిని ప్రత్యేక హోదా పేరుతో నియమించి.. వెనుకుండి చంద్రబాబే నాయుడు అతడ్ని ఆడిస్తున్నాడంటూ బీజేపీ ఆరోపిస్తుంది. అయితే వీరి ఆరోపణలకు బలాన్ని ఇస్తూ.. తరచూ చంద్రబాబుతో కలిసి వేదికల్ని పంచుకోవడం, హోదా విషయంలో మొదట ప్రత్యేక ప్యాకేజీకి ఓకే చెప్పి.. ఇప్పుడు హోదా అంటున్న తెలుగుదేశం పార్టీకికి ఒత్తాసు పలకడం కూడా శివాజీ వైఖరిపై అనుమానాలు వ్యక్తం అవుతున్నాయి.