కావేరీ వివాదంపై తమిళ సూపర్‌స్టార్ రజినీకాంత్ చేసిన వ్యాఖ్యలు కర్ణాటకలో పెను దుమారాన్నే రేపాయి. సుప్రీంకోర్టు తీర్పు ప్రకారం కావేరీ నీటిలో తమిళనాడుకు వాటా ఇవ్వాలని రజినీకాంత్ వ్యాఖ్యానించారు. ఈ వ్యాఖ్యలపై కన్నడిగులు తీవ్రంగా మండిపడుతున్నారు. దీంతో తలైవా తాజా చిత్రం కాలాను అడ్డుకుంటామని కొన్ని సంస్థలు ప్రకటించాయి. అయితే కావేరీకి, కాలాకు సంబంధం ఏంటని విలక్షణ నటుడు, సామాజిక కార్యకర్త ప్రకాశ్ రాజ్ నిలదీశారు. ట్విట్టర్ ద్వారా స్పందించిన ప్రకాశ్ రాజ్, కర్ణాటక, తమిళనాడులకు కావేరి జల వివాదం భావోద్వేగానికి గురిచేసే అంశంగా ఉంది.. కానీ దీనికి ఆచరణాత్మకమైన పరిష్కారాన్ని గుర్తించాలి కానీ, ఆవేశంగా కాదని ట్వీట్ చేశారు. మనిషికి, నదికి మధ్య ఓ అనుబంధం ఉంది. కాబట్టి, కావేరీ గురించి మాట్లాడినప్పుడల్లా కన్నడ, తమిళ ప్రజలు ఉద్వేగానికి గురవుతారు.. కానీ ఉద్వేగానికి లోనైంత మాత్రాన ఈ సమస్యకు పరిష్కారం దొరకదు... దీనికి ఆచరణాత్మక పరిష్కారం వెదకాలి’ అంటూ ఉద్వేగభరితమైన ట్వీట్ చేశారు. ‘కావేరీ వివాదానికి ‘కాలా’కు సంబంధం ఏంటి? ఎందుకు ఎప్పుడూ చిత్ర పరిశ్రమనే పావుగా చేస్తున్నారు? ఈ విషయంలో కాంగ్రెస్- జేడీఎస్ ప్రభుత్వం ఏమన్నా చర్యలు తీసుకుంటుందా? లేక ‘పద్మావత్‌’ విషయంలో బీజేపీ చేసినట్లే చేస్తాయా?’ బాధ్యతాయుతమైన రెండు రాష్ట్ర ప్రభుత్వాలు, కేంద్రంతో కలిసి కావేరీ సమస్యకు పరిష్కారం చూపాలి... రాజకీయ కారణాలు, ఒత్తిడి వల్ల ప్రభుత్వాలు స్పందించకపోతే మేమే వారికి బాధ్యతను గుర్తుచేయాల్సి వస్తుంది. అంతేకాదు పోరాటంతో రాజకీయ నాయకుల్లో జవాబుదారీతనం కలిగించడానికే గానీ, భావోద్వేగాలతో బాధితులుగా మారడానికి కాదు’ అని మండిపడ్డారు. కావేరీపై రజినీ వ్యాఖ్యలతో కన్నడిగులు మనోభావాలు దెబ్బతిన్నాయి.. దీన్ని తాను అంగీకరిస్తాను.. కానీ,‘కాలా’ విడుదలను అడ్డుకోవడం సరైన చర్య కాదని, దీనిపై మరోలా నిరసన తెలియజేయాలని సూచించారు.. సినిమాను నిషేధించడం వల్ల ఆయా సంఘాలకు కలిగే లాభం ఏంటో ఒక్క క్షణం ఆలోచించాలి. కోపంతో ఆయన సినిమాను నిషేధించాలని చూస్తున్నారు. కానీ కన్నడిగులకు కావాల్సింది సినిమాను నిషేధించడమా?’ అని నిలదీశారు. కన్నడిగులకు ఏం కావాలో నిర్ణయించడానికి వారెవరు?.. సినిమా విడుదలైతే దాన్ని చూడాలా, వద్దా అనేది ప్రజలే నిర్ణయించి తమ నిరసన తెలుపుతారు.. వారు నిర్ణయాలను మీరెలా నిర్దేశించగలరని’ మండిపడ్డారు. సినిమా కోసం నిర్మాతలు పడిన కష్టం ఏమైపోతుంది? రజనీ చేసిన వ్యాఖ్యలకు నిర్మాతలు ఎందుకు బాధపడాలి? ఓ సినిమా వెనుకు వందలాది మంది టెక్నీషియన్లు, సహ-నటులు, అనేక మంది కార్మికులు ప్రతిభ, కృషి దాగి ఉంది.. అలాగే థియేటర్లలో క్యాంటీన్లు నడిపేవారు, పోస్టర్లు అతికించేవారు, పార్కింగ్ స్టాండులను నిర్వహించేవారి జీవితాలు ఏమైపోవాలి?, డిస్ట్రిబ్యూటర్లు, నిర్మాతలు, థియేటర్ యజమానులు, వేలాది మంది దీనిపై ఆధారపడి జీవిస్తున్నారు ఏంకావాలి? వీరంతా మనుగడ సాగించడానికి కారణమవుతోన్న లక్షలాది మంది సినీ అభిమానుల సంగతేంటిని’ నిలదీశారు.ఆందోళనల పేరుతో వాహనాలకు నిప్పంటిస్తున్నారు.. మరి వారికి పరిహారం ఎవరిస్తారు? పిల్లలు పాఠశాలలకు వెళ్లలేకపోతున్నారు. వారి మాటేంటి? ఈ ఆందోళనల వల్ల తమిళనాడు, కర్ణాటక ప్రజల మధ్య విద్వేషం పెరిగిపోతోంది. కొంతమంది మా భావోద్వేగాలతో ఆడుకుంటున్నారు. ఈ సమస్య పరిష్కారమైతే మరో విషయంలో ఆందోళనలు చేస్తారు. చివరికి నష్టపోయేది మేమే. నేను ఇవన్నీ ప్రశ్నించడం వల్ల చర్చలు, సమావేశాలు పెట్టి నేను కన్నడిగులకు వ్యతిరేకిని అంటూ వ్యాఖ్యానిస్తారు. గతంలో నా అభిప్రాయాలను వ్యక్తం చేసినందుకు హిందూవ్యతిరేకినని ముద్రవేశారు. అయినా వాటిని వెల్లడించకుండా నన్ను అడ్డుకోలేకపోయారు. నేను చెప్పాల్సింది చెప్పాను. మిగతాది మీ విజ్ఞతకే వదిలేస్తున్నా’ అని భావోద్వేగ ట్వీట్‌ను ట్విట్టర్‌లో పోస్ట్ చేశారు.