చదువులో తాను వెనుకబడిన విద్యార్థినే, ముందు వరుసలో కూర్చుంటే ఎక్కడ తనపై లెక్చరర్లు ప్రశ్నల వర్షం కురిపిస్తారనే భయంతో వెనుక బెంచీల్లో కూర్చునేవాడిని’ అంటూ ఓ కార్యక్రమంలో సీఎం చేసిన వ్యాఖ్యలకు అక్కడున్నవారు అవాక్కయ్యారు. తాను చదువుకున్న కళాశాల వందేళ్ల ఉత్సవంలో కర్ణాటక సీఎం కుమారస్వామి  ప్రసంగించారు. ఈ సందర్భంగా ఆయన మాట్లాడుతూ.. లెక్చరర్లకు భయపడి కాలేజీలో వెనుక బెంచీలో కూర్చున్న తాను, ప్రస్తుతం అసెంబ్లీలో ముందు వరుసలో కూర్చుని ప్రతిపక్షాలు అడిగే ప్రశ్నలకు సమాధానం చెప్పాల్సి వస్తుందని అన్నారు. నేషనల్ ఎడ్యుకేషన్ సొసైటీ ఆఫ్ కర్ణాటక వందేళ్ల వార్షికోత్సవంతోపాటు ఈ సొసైటీ అధ్యక్షుడు హెచ్ నరసింహయ్య శత జయంతిని పురస్కరించుకుని ఉత్సవాలను ఘనంగా నిర్వహించారు. ఇదే కాలేజీ నుంచి కుమారస్వామి 1980లో డిగ్రీ పూర్తి చేశారు. తన విద్యార్థి జీవితాన్ని గుర్తుచేసుకున్న కర్ణాటక సీఎం... నటుడు రాజ్‌కుమార్‌కు తాను వీరాభిమానిని, ఆయన సినిమాలు ఒక్కటీ కూడా వదిలిపెట్టకుండా చూసేవాడ్నినని అన్నారు. ఒకవేళ తాను బాగా చదువుకుని ఉంటే, ఏ ఐఏఎస్ అఫీసర్‌ను అయ్యేవాడిని... కానీ విధి చాలా విచిత్రమైందని తెలిపారు. అంతేకాదు నువ్వో పనికిమాలిన వాడివి.. జీవితంలో ఎదగలేవని తన తండ్రి దేవెగౌడ ఎప్పుడూ తిట్టేవారు కానీ, తాను రాజకీయాల్లోకి ప్రవేశించి, తొలిసారి ఎంపీగా గెలుపొందానని అన్నారు. కష్టపడి పనిచేయడంతోనే తనకు గుర్తింపు దక్కిందని, తాను రాజకీయాల్లో అదృష్టవంతుడిగా భావిస్తానని పేర్కొన్నారు. కాలేజీ రోజుల్లో తమకు చాలా స్వేచ్ఛ ఉండేది.. ప్రస్తుత విద్యార్థులకు ఎన్నో బాధ్యతలు ఉన్నాయి.. నేను అప్పట్లో ఉన్నంత స్వేచ్చగా నేటి తరం లేదని అన్నారు. తనను విద్యార్థులు ఎప్పుడైనా కలసుకోవచ్చి, వారికి ఎలాంటి అపాయింట్‌మెంట్ గానీ, అనుమతి అవసరం లేదని స్పష్టం చేశారు. తన ఆఫీసుకు వచ్చి సీఎంను కలవాలని చెబితే సరిపోతుందని తెలిపారు.