దీర్ఘ చర్చల అనంతరం కర్ణాటకలో కాంగ్రెస్- జేడీఎస్ మంత్రివర్గం బుధవారం కొలువుదీరింది. కర్ణాటక ముఖ్యమంత్రిగా కుమారస్వామి మే 23 న ప్రమాణస్వీకారం చేసినా అనివార్య కారణాల వల్ల ఇప్పటి దాకా ఆయన మంత్రివర్గాన్ని విస్తరించలేదు. కాంగ్రెస్ నుంచి 22 మందికి, జేడీఎస్ నుంచి 12 మందికి మంత్రి పదవులు దక్కినా, ఆయా పార్టీలు మాత్రం అన్నింటీని భర్తీ చేయలేదు. ఈ విషయంలో కాంగ్రెస్, జేడీఎస్‌లు వ్యూహాత్మకంగా వ్యవహరిస్తున్నాయి. అసమ్మతి బెడద రాకుండా ముందు జాగ్రత్త చర్యలు తీసుకున్నాయి. ప్రస్తుతానికి కాంగ్రెస్ నుంచి 14 మంది, జేడీఎస్ నుంచి ఏడుగురు మాత్రమే మంత్రులుగా ప్రమాణం చేశారు. కొత్త మంత్రులతో రాజ్‌భవన్‌లో కర్ణాటక గవర్నర్ వాజూభాయ్ వాలా ప్రమాణస్వీకారం చేయించారు. ప్రభుత్వ ఏర్పాటుకు అవసరమైన మద్దతు కూడగట్టి విపక్ష ఎమ్మెల్యేలను ఆకర్షించడానికి బీజేపీ చేపట్టిన ఆపరేషన్ కమలంను సమర్ధవంతంగా తిప్పికొట్టి కాంగ్రెస్ ఎమ్మెల్యేలను చేజారిపోకుండా కాపాడిన నేత డీకే శివకుమార్‌కు సాగునీరు, వైద్య విద్య శాఖల బాధ్యతను అప్పగించారు. ఒప్పందం ప్రకారం కాంగ్రెస్‌కు హోం శాఖ, జేడీఎస్‌కు ఆర్థిక శాఖ కేటాయించారు. బీఎస్పీ తరఫున గెలుపొందిన ఏకైక ఎమ్మెల్యేకు కూడా మంత్రివర్గంలో చోటు దక్కింది. దీంతో యూపీ అవతల బీఎస్పీ తరఫున మంత్రి పదవి చేపట్టిన తొలి వ్యక్తిగా ఈయన నిలిచారు. అలాగే కర్ణాటక ప్రఙ్ఞావంత పార్టీ ఎమ్మెల్యేకు కూడా మంత్రి పదవి దక్కింది. సీఎం కుమారస్వామి సోదరుడు, జేడీఎస్ సీనియర్ నేత రేవణ్ణ కూడా మంత్రిగా ప్రమాణ స్వీకారం చేశారు. మంత్రులుగా ప్రమాణ స్వీకారం చేసినవారిలో డీకే శివకుమార్, రేవణ్ణ, దేశ్‌పాండే, బండెప్ప కాశంపూర్, జీటీ దేవెగౌడ, కేజే జార్జి, డీసీ తమ్మణ్ణ, వి మల్లప్ప, యూటీ ఖాదర్, కృష్ణభైరె గౌడ, ఎన్‌హెచ్ శివశంకర్ రెడ్డి, ఎస్ఆర్ శ్రీనివాస్, రమేశ్ జారకి హోళి, వెంకటరావ్ నారెగౌడ, ప్రియాంక్ ఖర్గే, ఎస్ఆర్ మహేశ్, జమీర్ అహ్మద్, జీఎస్ పుట్టరాజ్ ఉన్నారు.