న్యూ అండ్ రెన్యువ‌బుల్‌ ఎనర్జీ మోటో కార్ప్‌ టెక్ సంస్థ అవెరా ఆంధ్ర‌ప్ర‌దేశ్ రాష్ట్రంలో కొత్త ప్లాంట్‌ను నెలకొల్పనున్నట్లు పేర్కొంది. విద్యుత్‌ బ్యాటరీ స్కూటర్లను తయారు చేసే ఈ కంపెనీ అమరావతికి 18 కిలోమీటర్ల సమీపంలోని నున్నాలో దీన్ని ఏర్పాటు చేస్తున్నట్లు బిజినెస్ లైన్ ఓ కథనం వెల్లడించింది. ఈ కంపెనీ ఇప్పటికే రెండు విద్యుత్‌ స్కూటర్లను విడుదల చేసింది. వచ్చే ఏడాది మరో మూడు మోడళ్లను విడుదల చేయనున్నట్లు ప్రకటించింది. తెలుగు రాష్ట్రాల్లో అభరణాలు, టెక్స్‌టైల్‌ రిటైల్‌ వ్యాపారాల్లో ఉన్న చందన గ్రూపునకు చెందిన ఈ సంస్థ విద్యుత్‌ వాహనాల తయారీలోకి ప్రవేశించింది. 63 ఎకరాల్లో రూ.50 కోట్లతో ఎపిలో ప్లాంట్‌ను నెలకొల్పనున్నామని అవెరా న్యూ అండ్‌ రెవెవెబుల్‌ ఎనర్జీ మోటో కార్ప్‌ సహ వ్యవస్థాపకులు, చీఫ్‌ టెక్నలాజీ ఆఫీసర్‌ ఎ వెంకట రమణ తెలిపారు. తొలుత 10 ఎకరాల్లో 1.8 కిలోమీటర్ల టెస్టింగ్‌ ట్రాక్‌ను ఏర్పాటు చేస్తున్నామన్నారు. అనంతరం ప్లాంట్‌ను విస్తరిస్తామన్నారు. ఈ తయారీ ప్లాంట్‌ను తొలుత ఏడాదికి 25,000 యూనిట్ల సామర్థ్యంతో అందుబాటులోకి తేనున్నామని తెలిపారు. ఆకుల చాందిని చందనా మొత్తం మహిళ సిబ్బంది బృందాన్ని నడిపించనుందన్నారు. స్కూటర్ల తయారీ మాత్రమే కాకుండా సోలార్‌ పవర్‌ ఎలక్ట్రిక్‌ వెహికల్‌ ఛార్జింగ్‌ సెంటర్లను ఏర్పాటు చేయనున్నామని తెలిపారు. అమరావతిలో ఒక ఛార్జింగ్‌ కేంద్రాన్ని కూడా ఏర్పాటు చేయనున్నామన్నారు. స్కూటర్లలో ఉపయోగించే లిథియం బ్యాటరీలను ప్రముఖ తయారీదారు నుంచి కొనుగోలు చేయనున్నామని తెలిపారు. దశల వారిగా విద్యుత్‌ వాహన రంగం పెరగనుందని విశ్వాసం వ్యక్తం చేశారు. కేంద్ర పాలసీ వెల్లడి తర్వాత రాష్ట్ర ప్రభుత్వాలు కూడా దీనిపై దృష్టి పెట్టనున్నాయని పేర్కొన్నారు. దీంతో ఈ రంగంలో తమకు విస్తృతావకాశాలు లభించనున్నాయన్నారు.