బిగ్బాస్ 2లో పాల్గొంటున్నది ఎవరో తెలిసిపోయింది. ఎవరెవరు? అనే అంశంపై మొదటి నుంచి ఆసక్తి రేగగా, చివరకు వాళ్లెవరో తెలిసిపోయాకా మాత్రం, కొన్ని పెదవి విరుపులు తప్పడం లేదు. బిగ్బాస్ రెండో సీజన్ పార్టిసిపెంట్స్లో స్టార్డమ్ కనిపించకపోవడం విశేషం. ఇప్పుడు పాల్గొంటున్న వాళ్లు అంతో ఇంతో గుర్తింపు ఉన్నవాళ్లే. అయితే, ఎక్స్పెక్టేషన్లు ఇంతకు మించి ఉండేవి. ఆ అంచనాలను బిగ్బాస్ 2 అందుకోలేకపోయినట్టే అని చెప్పక తప్పడం లేదు. వాస్తవానికి తొలి ఎడిషన్ బిగ్బాస్ విషయంలోనే ఈ విమర్శ వచ్చింది. అంతకు ముందు ఇంటర్నేషనల్, నేషనల్ లెవల్ బిగ్బాస్ కార్యక్రమాలను చూసిన వాళ్లు.. తెలుగు బిగ్బాస్లో కూడా పేరున్న సెలబ్రిటీలు, హాట్ టాపిక్స్లో నిలిచే వాళ్లు కనిపిస్తారని అనుకున్నారు. తొలి ఎడిషన్ బిగ్బాస్లో కొందరు అనామకులు కనిపించే సరికి... అబ్బే ఇదేంటి! అనే కామెంట్ వచ్చింది. అదంటే తొలి ఎడిషన్, అంతే ఉంటుంది, రెండో ఎడిషన్లో కచ్చితంగా పేరున్న నటీనటులు లేదా ఫామ్ లోని లేని ఒకప్పటి స్టార్లు, ఉంటారని అంతా అనుకున్నారు. కట్ చేస్తే.. అలాంటి మెరుపులు ఏమీ కనిపించడం లేదు. ప్రస్తుతం హౌస్లో ఉన్నవాళ్లలో వీళ్లు గొప్ప, వీరు తక్కువ అని చెప్పడానికి ఏమీ లేదు కానీ, వీళ్లందరినీ చూస్తుంటే ఇంతకు మించి ఎక్స్పెక్ట్ చేసిన వాళ్లు మాత్రం కొంత నిరాశకే లోనవుతున్నారు. ప్రత్యేకించి ఈ షో మాస్లోకి వెళ్లడానికి తగిన వాళ్లు కనిపించడం లేదు. తొలి ఎడిషన్లో ఎన్టీఆర్ వంటి బ్రహ్మాండమైన మాస్ ఫాలోయింగ్ ఉన్న హీరో ఈ షోను జనాల్లోకి తీసుకెళ్లగలిగాడు. ఇప్పుడు ఆయన కూడా లేడనే విషయాన్ని గుర్తుంచుకోవాలి.