ముంబై, డిసెంబర్ 26, 
సాధారణంగా ప్రభుత్వ ఉద్యోగులు లంచాలు తీసుకుంటూ.. భారీ అవినీతి చేసి దొరికిపోతూ ఉంటారు. అయితే కొందరు ప్రభుత్వ ఉద్యోగులు కాకపోయినా.. ప్రభుత్వ కార్యాలయాల్లో కాంట్రాక్టు ఉద్యోగాలు చేస్తూనే భారీగా సంపాదించేవారు ఉంటారు. అందుకే చాలా కాంట్రాక్ట్ ఉద్యోగాలను లక్షలు పోసి కొనుగోలు చేసి దక్కించుకునేవారిని మనం చూస్తూనే ఉన్నాం. అయితే అలాంటి ఒక చిన్న కాంట్రాక్ట్ ఉద్యోగి.. ఏకంగా రూ.21 కోట్ల అవినీతి చేసి దొరికిపోయాడు. అయితే అతడి జీతం కేవలం రూ.13 వేలు కాగా.. అక్రమంగా కోట్లు కూడబెట్టాడు. పైగా సంపాదించిన అవినీతి సొమ్ముతో జల్సాలు చేయడమే కాకుండా.. తన లవర్‌కు కూడా కోట్లు ఖర్చు పెట్టి భారీగా బహుమతులు ఇచ్చాడు. సంపాదించేది వేలల్లో ఖర్చు పెట్టేది కోట్లల్లో అయ్యేసరికి.. అందరికీ అనుమానం వచ్చింది. అసలు అతడి సంగతేంటా అని ఆరా తీస్తే.. బాగోతం బయటపడింది. మహారాష్ట్రలో జరిగిన ఈ వ్యవహారం ఇప్పుడు తీవ్ర సంచలనం రేపుతోంది. మహారాష్ట్రలో ఛత్రపతి శంభాజీనగర్‌ జిల్లాలో ఓ కాంట్రాక్ట్ ఉద్యోగి అవినీతి బాగోతం బయటికి రావడంతో అంతా ముక్కున వేలేసుకుంటున్నారు. హర్ష్ కుమార్ క్షీరసాగర్ అనే వ్యక్తి.. డిపార్ట్‌మెంటల్ స్పోర్ట్స్ కాంప్లెక్స్ అడ్మినిస్ట్రేషన్ కార్యాలయంలో కాంట్రాక్ట్ ఉద్యోగిగా.. రూ.13 వేలకు చేరాడు. అయితే అక్కడ ఉన్న లొసుగులను పక్కాగా అర్థం చేసుకున్న హర్ష్ కుమార్ క్షీరసాగర్ తనకు తెలిసిన మరో వ్యక్తితో కలిసి అక్రమ దందా మొదలుపెట్టాడు. ఎవరికీ దొరక్కపోవడంతో.. ప్రభుత్వం నుంచి ఏకంగా రూ. 21.59 కోట్లు మోసం చేశారు. వీరిద్దరూ కిలిసి ఇంటర్నెట్ బ్యాంకింగ్ ద్వారా ఛత్రపతి శంభాజీనగర్‌లోని డిపార్ట్‌మెంటల్ స్పోర్ట్స్ కాంప్లెక్స్ అడ్మినిస్ట్రేషన్ కార్యాలయం నుంచి ఈ డబ్బును స్వాహా చేశారు.అయితే ఈ దొంగిలించిన సొమ్ముతో నిందితుల్లో ఒకరు తన ప్రియురాలి కోసం ఛత్రపతి శంభాజీ నగర్ ఎయిర్‌పోర్టుకు ఎదురుగా ఉండే అత్యంత లగ్జరీ అపార్ట్‌మెంట్లో 4 BHK ఫ్లాట్‌ను కొనుగోలు చేశారు. అంతేకాకుండా బీఎండబ్ల్యూ కారు, బీఎండబ్ల్యూ బైక్ కొన్నారు. ఇక తన లవర్ కోసం నగరంలోని ఒక నగల వ్యాపారి నుంచి వజ్రాలు పొదిగిన గాజులను కూడా కొని గిఫ్ట్ కింద ఇచ్చేశాడు. ఇక ఈ అవినీతితో ప్రమేయం ఉన్న మరో మహిళా కాంట్రాక్ట్ ఉద్యోగి యశోదా శెట్టి భర్త బీకే జీవన్ రూ. 35 లక్షల విలువ చేసే ఒక ఎస్‌యూవీ కారును కూడా కొనుగోలు చేసినట్లు అధికారుల విచారణలో తేలింది. ప్రస్తుతం ప్రధాన నిందితుడు హర్ష్ కుమార్ క్షీరసాగర్ తన కారు తీసుకుని పరారీలో ఉన్నట్లు ప్రాథమిక దర్యాప్తులో తేలింది.ప్రభుత్వ నిధుల కోసం ఇండియన్ బ్యాంక్‌లో స్పోర్ట్స్ కాంప్లెక్స్ పేరుతో ఓపెన్ చేసిన అకౌంట్ నుంచి నిందితులు ఈ కుంభకోణానికి పాల్పడినట్లు అధికారులు గుర్తించారు. అయితే ఆ అకౌంట్ నుంచి డబ్బులు తీయాలంటే డిప్యూటీ స్పోర్ట్స్ డైరెక్టర్ సంతకం అవసరం కాగా.. అయితే కాంప్లెక్స్‌లోని కాంట్రాక్టు ఉద్యోగులైన హర్ష్‌కుమార్ క్షీరసాగర్, యశోదా శెట్టి, ఆమె భర్త బీకే జీవన్‌లు ఇండియన్ బ్యాంకుకు ఇచ్చే పత్రాలను ఫోర్జరీ చేశారు. ఇక ఆ ఫేక్ డాక్యుమెంట్స్‌ను ఉపయోగించి ఇంటర్నెట్ బ్యాంకింగ్‌ను యాక్టివేట్ చేసి.. ఆ అకౌంట్ నుంచి తమ అకౌంట్లలోకి కోట్లాది రూపాయల నిధులను ట్రాన్స్‌ఫర్ చేసినట్లు వెల్లడైంది. డిపార్ట్‌మెంటల్ డిప్యూటీ డైరెక్టర్ 6 నెలల తర్వాత ఈ కుంభకోణాన్ని గుర్తించడం గమనార్హం. దీనికితోడు వీరిద్దరూ కాంట్రాక్ట్ ఉద్యోగులు అయినా.. వారి జీవన విధానం, కార్లు, బైక్‌లు, ఫ్లాట్‌ల విషయం తెలిసి.. వారిపైనా మొదట అనుమానం రాగా.. విచారణలో వాళ్లే నిందితులు అని తేలింది.