ఖమ్మం, జనవరి 11, 
తేలంగాణలో కొత్త కార్పొరేషన్ ఏర్పాటుకు రంగం సిద్ధమవుతోంది. ఇప్పటికే.. రాష్ట్రంలో 13 నగరపాలక సంస్థలుండగా.. తాజాగా కొత్తగూడెంను కూడా కార్పొరేషన్‌గా ప్రమోట్ చేసేందుకు రేవంత్ రెడ్డి సర్కార్ యోచిస్తోంది. ఇందుకు సంబంధించిన ప్రతిపాదనలను ప్రభుత్వం పరిశీలిస్తున్నట్టు సమాచారం. అయితే.. ప్రస్తుతం మున్సిపాలిటీలుగా ఉన్న కొత్తగూడెం, పాల్వంచలతో పాటుగా 4 మండలాల్లోని 35 గ్రామ పంచాయితీలను కొత్తగా ఏర్పాటుచేయబోయే కార్పొరేషన్‌లో విలీనం చేసే దిశగా ప్రభుత్వం కసరత్తు చేస్తోంది.భారత జనగణన గణాంకాల ప్రకారం కొత్తగూడెం మున్సిపాలిటీ జనాభా మొత్తం 1,88,191 (పురుషులు 93,300, స్త్రీలు 94,891) ఉండగా.. పాల్వంచ పరిధిలోనూ లక్ష మందికిపైగా జనాభా నివసిస్తున్నారు. అయితే.. సుజాతనగర్ మండలంలోని ప్రతిపాదిత 7 పంచాయతీల పరిధిలో 11,124, చుంచుపల్లిలోని 14 పంచాయతీల పరిధిలో 41,860, లక్ష్మీదేవిపల్లి మండలంలోని 10 పంచాయతీల్లో 21,432, పాల్వంచలోని నాలుగు పంచాయతీల్లో 5,903 మంది నివసిస్తున్నారు. రెండు మున్సిపాలిటీలతోపాటు పంచాయతీలు కలిపితే మొత్తం జనాభా సుమారు 4 లక్షల వరకు చేరే అవకాశం ఉంది. కొత్తగూడెంను కార్పొరేషన్‌‌గా ఏర్పాటు చేసేందుకు ప్రభుత్వం అన్ని అంశాలను పరిశీలిస్తోంది. జిల్లా కేంద్రంగా ఉన్న కొత్తగూడెంను నగర పాలక సంస్థగా ఏర్పాటు చేయాలని ఎమ్మెల్యే కూనంనేని సాంబశివరావు ఇప్పటికే పలుమార్లు సీఎం రేవంత్‌ రేవంత్ రెడ్డి కోరగా.. గ్రీన్ సిగ్నల్ ఇచ్చినట్టు సమాచారం. ఈ నేపథ్యంలో కొత్త కార్పొరేషన్‌ ఏర్పాటు విషయాన్ని త్వరలోనే సీఎం రేవంత్‌రెడ్డి ప్రకటించనున్నట్లు తెలిసింది.కొత్తగూడెం, పాల్వంచ మున్సిపాలిటీలు కలిపి కార్పొరేషన్‌గా ఏర్పాటు చేస్తే.. ఆ ప్రాంతానికి మహర్ధశ వచ్చే అవకాశాలున్నాయని స్థానికులు భావిస్తున్నారు. తెలంగాణకు సిరులగణి అయిన సింగరేణికి కొత్తగూడెం హెడ్ క్వార్టర్స్‌గా ఉండగా.. కొత్తగూడెం థర్మల్ విద్యుత్ కేంద్రంతో పాటు స్పాంజి ఐరన్‌ ఇండియా లిమిటెడ్‌ లాంటి ప్రముఖ కంపెనీలతో పాల్వంచ ప్రాంతం ఇండస్ట్రియల్ కారిడార్‌గా ఉన్నప్పటికీ.. ఆ ప్రాంతం గత పదేళ్లలో అనుకున్నంత అభివృద్ధికి నోచుకోకపోవటం గమనార్హంభద్రాద్రి జిల్లా అభివృద్ధిపై ప్రత్యేక దృష్టి సారించిన రేవంత్ రెడ్డి సర్కార్.. రాష్ట్రానికి కొత్త ఎయిర్‌పోర్టులు తీసుకొచ్చే క్రమంలో కొత్తగూడెంలో విమానాశ్రయాన్ని ఏర్పాటు చేసేందుకు కసరత్తు చేస్తోంది. ఇప్పటికే కొత్తగూడెంకు రైల్వే స్టేషన్ ఉండగా.. ఎయిర్ పోర్టు కూడా వస్తే జిల్లాకు రవాణా సౌకర్యాలు మెరుగవటమే కాకుండా.. ఆ ప్రాంతంలో రియల్ ఎస్టేట్ పెరిగి, మరిన్ని కంపెనీలు కూడా వచ్చే అవకాశం ఉందని భావిస్తోంది. ఫలితంగా అభివృద్ధి కూడా అంతే వేగంగా జరుగుతుందని యోచిస్తోంది. ఈ క్రమంలో.. రెండు మున్సిపాలిటీలను కలిపేసి కార్పొరేషన్‌గా ప్రమోట్ చేయటం వల్ల ఆ ప్రాంతానికి మహర్ధశ పట్టనుందని స్థానిక ప్రజలు భావిస్తున్నారుమరోవైపు.. కాంగ్రెస్ పార్టీకి కంచు కోటగా మారిన ఉమ్మడి ఖమ్మం జిల్లాలో గత రెండు ఎన్నికల్లో బీఆర్ఎస్ పార్టీకి కేవలం ఒక్క సీటే వస్తుండటం గమనార్హం. అందులోనూ.. ఈసారి గెలిచిన తెల్లం వెంకట్రావు కాంగ్రెస్ కండువా కప్పుకోవటంతో.. ఖమ్మం జిల్లా మొత్తం కాంగ్రెస్ మయంగా మారిపోయింది. దీంతో.. ప్రభుత్వం ప్రత్యేక దృష్టి సారింది ఈ ప్రాంతాన్ని అభివృద్ధి చేస్తేనే.. ఖమ్మం జిల్లాపై పట్టు కోల్పోకుండా ఉండొచ్చన్నది కాంగ్రెస్ యోచన. ఇందులో భాగంగానే.. కొత్తగూడెంలో కొత్త ఎయిర్ పోర్టు ఏర్పాటు చేసేందుకు ప్రయత్నాలు చేస్తున్నారు. మరోవైపు.. పోలవరం ప్రాజెక్టు పూర్తయితే వలస వెళ్లిన పాల్వంచ ప్రాంతంలోని ప్రజలు తిరిగి స్వగ్రామాలకు చేరుకునే అవకాశాలు కూడా ఉన్నాయి.
కార్పొరేషన్‌లో విలీనానికి అవకాశమున్న గ్రామాలు
చుంచుపల్లి మండలంలోని 3 ఇంక్లైన్‌, 4 ఇంక్లైన్‌, బాబు క్యాంప్‌, చుంచుపల్లి (పిటి), ధన్‌బాద్‌, గౌతంపూర్‌, ఎన్‌కే.నగర్‌ (బదావత్‌ తండా), నంద తండా, పెనుబల్లి, ప్రశాంతినగర్‌, రామాంజనేయ కాలనీ, రుద్రంపూర్‌, వెంకటేశ్వరకాలనీ, విద్యానగర్‌ కాలనీ
లక్ష్మీదేవిపల్లి మండలంలోని అశోక్‌నగర్‌ కాలనీ, చాతకొండ (ఆర్‌), హమాలీకాలనీ, లక్ష్మీదేవిపల్లి, లోతువాగు, ప్రశాంత్‌ నగర్‌, సంజయ్‌ నగర్‌, సాతివారిగూడెం, శేషగిరినగర్‌, శ్రీనగర్‌ కాలనీ
పాల్వంచ మండలంలోని బసవతారక కాలనీ, జగన్నాథపురం, కేశవపురం, లక్ష్మీదేవిపల్లి (ఎస్‌)
సుజాతనగర్ మండలంలోని 2ఇంక్లైన్‌ (హెడ్‌ క్వార్టర్‌), కోమటిపల్లి, లక్ష్మీదేవిపల్లి, నిమ్మలగూడెం, మంగపేట, నాయకులగూడెం, సుజాతనగర్