తెలుగు తెరపై అదిరిపోయే జోడీ అంటే టక్కున చెప్పే పేర్లు ప్రభాస్, అనుష్క. తెరపై వాళ్ల కెమిస్ట్రీ, బయట వాళ్లిద్దరి మధ్య స్నేహం అందరికీ తెలిసిందే. వీళ్లిద్దరి మధ్య ఉన్న చనువు కారణంగా వీరిపై అనేక రూమర్లు ఇప్పటికే చక్కర్లు కొట్టాయి. వాటిలో ప్రధానమైంది పెళ్లి. ప్రభాస్, అనుష్క పెళ్లిచేసుకోబోతున్నారంటూ ప్రచారం జరిగింది. ఈ రూమర్‌ను వాళ్లిద్దరూ ఖండించడంతో కొన్నాళ్లు ప్రశాంతంగానే ఉంది. మళ్లీ ఈ మధ్య ఆ ప్రచారం ఊపందుకుంది. రెండు కుటుంబాల మధ్య చర్చలు జరుగుతున్నాయని.. త్వరలోనే ప్రభాస్, అనుష్క పెళ్లి పీటలు ఎక్కబోతున్నారని వార్తలు వచ్చాయి. కానీ దీనిలోనూ నిజం లేదని తేలింది. ప్రభాస్ పెద్దలు కుదిర్చిన వివాహమే చేసుకుంటున్నారని తెలిసింది. ప్రభాస్ తల్లి శివ కుమారి, పెదనాన్న కృష్ణంరాజు ఒక అమ్మాయిని అనుకున్నారట. భీమవరంలో విద్యాసంస్థలను నడుపుతోన్న ఓ ప్రముఖ వ్యక్తి కుమార్తెను ప్రభాస్‌కు అడుగుతున్నారని సమాచారం. ఇప్పటికే రెండు కుటుంబాల మధ్య సంప్రదింపులు జరిగాయని, ప్రస్తుతం మాటల్లో ఉన్న ఈ సంబంధం ఖరారైతే అధికారిక ప్రకటన వెలువడుతుందని తెలుస్తోంది. అనుష్క, ప్రభాస్ మంచి స్నేహితులు మాత్రమేనని, వారిపై ఇలాంటి తప్పుడు వార్తలు ఎందుకు వస్తున్నాయో అర్థం కావడంలేదని కుటుంబ సభ్యులు ఆవేదన వ్యక్తం చేస్తున్నారట.  ప్రస్తుతం అనుష్క తీర్థ యాత్రలో భాగంగా హిమాలయాలకు వెళ్లారు. అనుష్క జాతకంలో ఏదో దోషం ఉందని, దాన్ని సరిదిద్దుకోవడానికే ఆమె హిమాలయాలకు వెళ్లారని అంటున్నారు. ఆమె కుటుంబ సభ్యులు కూడా పలు రకాల పూజలు చేయిస్తున్నారట. ఈ ఏడాది ఆఖరికి ఎలాగైనా అనుష్కకు పెళ్లి చేయాలని చూస్తున్నారట. అంతా సవ్యంగా జరిగే ఈ ఏడాది వీరిద్దరి పెళ్లిళ్లనూ చూసేయొచ్చు.