కొత్త కార్లు కొనొద్దు, విమానాల్లో ఎకానమీ క్లాస్‌లో ప్రయాణించండి, ప్రభుత్వ ఆఫీసులు, అధికారిక నివాసలకయ్యే ఖర్చులు తగ్గించండంటూ కర్ణాటక సీఎం కుమారస్వామి పదే పదే కోరుతున్నారు. రూ.50 కోట్ల విలువైన రైతు రుణ మాఫీకి ఈ చర్యలు ఉపకరిస్తాయని ఆయన భావిస్తున్నారు. అందులో భాగంగానే సీఎం అధికారిక నివాసానికి మారలేదు. జేపీ నగర్లోని సొంత ఇంట్లో నుంచే వ్యవహారాలు చక్కబెడుతున్నారు. పొదుపు చర్యల్లో భాగంగా కుమారస్వామి తన వ్యక్తిగత ఎస్‌యూవీనే వాడుతున్నారు. ఆయన వాడే టాప్ ఎండ్ రేంజ్ రోవర్ ధర కోటిన్నర రూపాయల పైమాటే. ఇంతకు ముందు సిద్ధ రామయ్య టయోటా ఫార్చ్యునర్ వాడారు. కుమారస్వామికి ఇప్పటికే రెండుసార్లు హార్ట్ సర్జరీ జరిగింది. దీంతో శారీరకంగా ఒత్తిడిని తగ్గించుకోవాలని డాక్టర్లు సలహా ఇచ్చారు. కస్తూరి మీడియా ప్రయివేట్ లిమిటెడ్ పేరిట రిజిస్టర్ అయిన కుమారస్వామి రేంజ్ రోవర్లో ప్రత్యేకమైన షాక్ అబ్జర్వర్లను అమర్చారు. సీట్లు కూడా మరింత సౌకర్యంగా ఉంటాయి. పొదుపు చేద్దామంటూ కుమారస్వామి పిలుపునివ్వడం పట్ల సామాజిక కార్యకర్తలు మండిపడుతున్నారు. మీరు వాడే కారు తాగే డీజిల్ ఎంత? సీఎం తన సొంత వాహనం వాడుకోవడం అంత గొప్ప విషయమా? అని నిలదీస్తున్నారు. కొత్త కార్లు కొనొద్దన్న కుమారస్వామి నిర్ణయం పట్ల మంత్రులు కూడా అసంతృప్తి ఉన్నప్పటికీ బయట పడటం లేదు. అధికారులు మాత్రం సీఎం చేపడుతున్న పొదుపు చర్యల్లో సొంత కారు వాడటం ఒకటని, ఇంకా ఆయన చాలా చేస్తున్నారని సెలవిస్తున్నారు. ప్రస్తుతం మా దగ్గర 36 వాహనాలున్నాయి. ఏవీ 50 వేల కి.మీ. మించి ప్రయాణించలేదు. అవన్నీ మంచి కండీషన్లోనే ఉన్నాయని ప్రభుత్వ అధికారి ఒకరు తెలిపారు. కొత్త వాహనాలు కొనే ప్రతిపాదనేదీ లేదని ఆయన చెప్పారు. కొసమెరుపు ఏంటంటే.. ప్రస్తుతం వాడుతున్న రేంజ్ రోవర్ కారు కుమారస్వామి కుటుంబానికి కలిసొచ్చిందట. అందుకే దాన్నే వాడాలని ఇంట్లో వాళ్లు సూచించారని సమాచారం. ఇక సీఎం సొంతింటి నుంచే పనులు చక్కబెట్టడానికి, అధికారిక నివాసానికి వెళ్లడానికి కూడా ‘పొదుపు చర్యలు’ కాకుండా వేరే కారణం ఉంది. అదేంటంటే.. సీఎం అధికారిక నివాసానికి వాస్తు లోపం ఉందట. ఆయన సొంతింటికి వాస్తు బాగుంది, లక్కీ అనే నమ్మకం ఉంది. ఆ ఇంట్లోకి వెళ్లాకే ఆయనకు అన్ని రకాలుగా కలిసొచ్చిందట. కుమారస్వామి పొదుపు చర్యల వెనుక కారణాలు ఇవేనని గుసగుసలు వినిపిస్తున్నాయి.