దివంగత ముఖ్యమంత్రి వైఎస్ రాజశేఖర్ రెడ్డి బయోపిక్ ‘యాత్ర’రెగ్యులర్ షూటింగ్ శుక్రవారం నుంచి మొదలైంది. వైఎస్సార్ పాత్రలో మమ్ముట్టీ నటిస్తున్న ఈ సినిమా ఇలా పట్టాలెక్కింది. వైఎస్ చేపట్టిన ‘ప్రజాప్రస్థానం’ పాదయాత్రను కథాంశంగా తీసుకుని ఈ సినిమాను రూపొందిస్తున్నట్టుగా దీని రూపకర్తలు ప్రకటించారు. అందుకే టైటిల్‌ను ‘యాత్ర’గా పెట్టారు. సింగిల్ షెడ్యూల్‌లో ఈ సినిమాను పూర్తి చేయనున్నట్టుగా తెలుస్తోంది. ఈ సందర్భంగా మమ్ముట్టీ ఈ సినిమా సెట్స్ మీదకు అడుగుపెట్టిన సమయంలో గ్రాండ్‌గా వెల్కమ్ చెప్పారు నిర్మాతలు. మమ్ముట్టీ నటించిన సూపర్ హిట్ సినిమా ‘దళపతి’లోని ‘సింగారాల..’ సాంగ్‌కు అనుగుణంగా డ్యాన్సర్లు డ్యాన్స్ చేయగా.. ఆ సమయంలో మమ్ముట్టీ అక్కడ అడుగుపెట్టారు. వాయిద్యాల హోరుతో ఈ విధంగా మలయాళ సూపర్ స్టార్‌కు వెల్కమ్ చెప్పింది ‘యాత్ర’ యూనిట్. అందుకు సంబంధించిన వీడియోను సోషల్ మీడియాలో పోస్టు చేశారు. వైఎస్ అభిమానుల మధ్యన ఆ వీడియో వైరల్‌గా మారింది. మహీ వీ రాఘవ్ దర్శకత్వంలో ‘యాత్ర’ రూపొందుతోంది. శశి దేవిరెడ్డి, విజయ్ చిల్లాలు ఈ సినిమాను నిర్మిస్తున్నారు. వచ్చే సంక్రాంతికి ఈ సినిమా విడుదల అయ్యే అవకాశాలున్నాయి.