బాలీవుడ్ సెన్సేషన్ మల్లికా శెరావత్.. కాస్టింగ్ కౌచ్‌పై సంచలన విషయాలు బయటపెట్టింది. హీరోలతో తెరవెనుక చనువుగా ఉండకపోవడం వల్లే తనను చాలా సినిమాల నుంచి తీసేశారని, తన ప్రతిభకు తగిన అవకాశాలు రాలేదని ఆవేదన వ్యక్తం చేసింది. సినిమాల్లో తాను పోషించిన పాత్రల ఆధారంగా తనపై తప్పుడు అభిప్రాయం ఏర్పరచుకున్నారని, బయట కూడా అలాగే ఉండాలని ఒత్తిడి చేశారని చెప్పింది. పీటీఐకి ఇచ్చిన ఇంటర్వ్యూలో తన సినీ ప్రయాణం, ఇండస్ట్రీలో వేధింపులపై సంచలన విషయాలు చెప్పింది మల్లిక. ఇండస్ట్రీలో తనకు ‘బోల్డ్ నటి’, ‘గ్లామరస్‌ నటి’, ముద్దు సీన్లలో నటిస్తుందనే పేరు రావడానికి దర్శకులు, సహ నటీనటులే కారణం అని మల్లిక చెప్పింది. ‘మల్లిక అన్నింటికీ రాజీపడుతుంది.. అందుకే ఎలాంటి సన్నివేశాల్లో నటించడానికైనా ఒప్పుకుంటుంది’ అనుకునేవారని తెలిపింది. 2004లో వచ్చిన ‘మర్డర్‌’ చిత్రంతో మల్లిక బాలీవుడ్‌కు పరిచయమైంది. ఈ సినిమాలో ఆమె బోల్డ్‌ సన్నివేశాల్లో నటించారు. ‘మర్డర్ సినిమా తర్వాత మల్లిక ఇలాంటి పాత్రలకే సరిపోతుంది’ అనే ముద్ర పడిపోయిందని ఆమె ఆవేదన వ్యక్తం చేసింది. మర్డర్ సినిమా చేసిన తర్వాత నాపై ఎన్నో కామెంట్లు, విమర్శలు వచ్చాయి. పొట్టి దుస్తులు వేసుకున్నా.. తెరపై ముద్దు సన్నివేశాల్లో నటించినా.. సిగ్గు వదిలేసిన మహిళ అని అనేస్తుంటారు. అప్పుడు మగవారు మనల్ని అలుసుగా తీసుకుంటారు. సమాజంలో జరుగుతున్నది ఇదే. నాకు ఇలాంటి అనుభవాలు అనేకం ఎదురయ్యాయి’ అని మల్లిక చెప్పింది. హీరోలతో తెర వెనుక సన్నిహితంగా లేనందుకు చాలా సినిమాల నుంచి తనను తొలగించినట్లు మల్లిక చెప్పింది. ‘తెరపై నటిస్తావు కదా? మరి బయట చనువుగా ఉండటానికి ఇబ్బంది ఏంటి?’ అంటూ ప్రశ్నించేవారని తెలిపింది. ‘కానీ, నేను రాజీ పడే మహిళను కాదు. ఆత్మవిశ్వాసం ఉన్న మహిళను. అలాంటి వాటికి తలొగ్గకపోవడం వల్లే ఎన్నో పాత్రలు కోల్పోయా. సమాజంలో మహిళలు ఎలాంటి కష్టాలు ఎదుర్కొంటున్నారో దీన్ని బట్టే అర్థమవుతోంది’ అని మల్లిక చెప్పుకొచ్చింది. నేను అలా చేయలేదు కాబట్టే నాలోని నటనా నైపుణ్యాలను బయటపెట్టలేకపోయాను. ఎన్నోసార్లు దర్శకులు ఫోన్లు చేసి తెల్లవారుజామున 3 గంటలకు వచ్చి కలవమనేవారు. కానీ, అలాంటి విషయాలు బయటికి చెప్పాలంటే నాకు చాలా భయం. ఎందుకంటే తప్పు నాదేనని సులువుగా నిందలు వేస్తారు. జనం కూడా వాటిని తేలిగ్గా నమ్ముతారని నాకు తెలుసు. మీడియాలో రాసే కథనాలు కూడా అందుక్కారణం. చాలా సందర్భాల్లో మీడియా నాకు వ్యతిరేకంగా ఉండేది. నా గురించి ఏదో ఒక వార్త రాసి సంచలనం సృష్టించడానికే చూసేది. అది నన్ను చాలా బాధించేది’ అని మల్లిక ఆవేదన వ్యక్తం చేసింది.సినిమాలో అలాంటి సన్నివేశాల్లో నటించానని రాసేవారు. కానీ, ఎలాంటి పరిస్థితిలో అలా నటించాల్సి వచ్చిందో ఎవరూ పట్టించుకునేవారు కాదు. ఇది నన్ను అభద్రతాభావానికి గురి చేసేది. ఓసారి నన్ను ఇంటర్వ్యూ చేసిన సీనియర్‌ జర్నలిస్టు కూడా ఇలాంటి తప్పుడు ప్రశ్నలే అడిగాడు. నన్ను కాపాడటానికి ఎవ్వరూ ముందుకు రాలేదు’ అని మల్లికా శెరావత్ చెప్పింది. 

మర్డర్‌తో పాటు బాలీవుడ్‌లో ‘క్వాయిష్’, ‘అగ్లీ ఔర్ పగ్లీ’, ‘కిస్ కిస్ కీ కిస్మత్’, ‘వెల్‌కం’, ‘హిస్’ తదితర సినిమాల ద్వారా మల్లిక గుర్తింపు తెచ్చుకుంది. బాలీవుడ్‌లో ఆమె చివరి సినిమా 2015లో వచ్చిన ‘డర్టీ పాలిటిక్స్’. ‘జీనత్’ అనే చిత్రం ద్వారా ఆమె త్వరలో మళ్లీ ప్రేక్షకుల ముందుకు వస్తోంది. మిత్, టైమ్ రైడర్స్, పాలిటిక్స్ ఆఫ్ లవ్ లాంటి హాలీవుడ్ చిత్రాల్లోనూ మల్లిక నటించింది. ప్రత్యేక గీతాల్లో నర్తించినందుకు వచ్చినంతగా మంచి పాత్రల్లో నటించినందుకు ఆమెకు గుర్తింపు రాలేదు.