కొన్ని పార్టీలు రాష్ట్రంపై కక్షగట్టి కుట్రలు చేస్తున్నాయన్నారు మంత్రి దేవినేని ఉమామహేశ్వరరావు ‘మేం కష్టపడి ప్రాజెక్టుల్ని పూర్తి చేస్తుంటే.. కొందరు మాత్రం కేసులు వేసి అడ్డుపడుతున్నారు. కాంగ్రెస్‌ హయాంలో జలయజ్ఞాన్ని ధనయజ్ఞం చేశారు.. ప్రాజెక్టులు పూర్తి చేయలేదు.. నీళ్లు ఇవ్వలేదు. కాంగ్రెస్ నేతలే బీజేపీ, వైసీపీ, జనసేన నేతలైపోతున్నారు. కాంగ్రెస్‌ హయాంలో పదేళ్ల పాటు మంత్రులుగా ఉన్న బొత్స సత్యనారాయణ, కన్నా లక్ష్మీనారాయణ, ధర్మాన ప్రసాదరావులు రాష్ట్రానికి ఏం చేశారు. రాష్ట్రాన్ని విభజించిన వారే ఇప్పుడు నీతులు చెప్పడం హాస్యాస్పదంగా ఉంది’అన్నారు మంత్రి. పట్టిసీమపై కాంగ్రెస్, వైసీపీ నేత‌లు అనవసర రాద్ధాంతం చేస్తున్నారు. ఆల్మట్టికి ఇప్పటి వ‌ర‌కూ నీళ్లు రాలేదు.. అయినా పట్టిసీమ ద్వారా కృష్ణా డెల్టాకు నీళ్లిస్తుంటే వీరంతా కుళ్లుకుంటున్నారు. పట్టిసీమను అందరూ అభినందిస్తుంటే జ‌గ‌న్‌కు కనిపించడం లేదా. పోల‌వ‌రం ప్రాజెక్టు చూడ‌కుండానే గోదావ‌రి జిల్లా దాటిన వ్యక్తి మన ప్రతిపక్ష నేత. రాజ్యసభలో ప్రశ్నలు వేస్తూ పక్కరాష్ట్రాలకు వైసీపీ ఎంపీ విజయసాయిరెడ్డి సమాచారం కూడా ఇస్తున్నారని’మండిపడ్డారు ఉమ. వైసీపీ ఎమ్మెల్యేలు అసెంబ్లీకి రారు.. ఎంపీలు పార్లమెంట్‌కు వెళ్లరు. రాష్ట్ర ప్రయోజనాలు పట్టని వీరి అవసరం ప్రజలకు లేదు. వైసీపీ, జనసేన బీజేపీతో కలిసి విమర్శలు చేస్తున్నాయి. ఈ మూడు పార్టీలూ తోడు దొంగలే.. వచ్చే ఎన్నికల్లో ప్రజలు బుద్ధి చెప్పేందుకు సిద్ధంగా ఉన్నారని’వ్యాఖ్యానించారు. ప్రాజెక్టుల పురోగతిపై మంత్రి మాట్లాడారు. వైకుంఠపురం బ్యారేజ్‌కు ఈ నెల‌లో టెండ‌ర్లను పిలుస్తున్నామన్నారు. 10 టీఎంసీల సామర్థ్యంతో ఈ బ్యారేజ్‌ నిర్మాణం ఉంటుందన్నారు. గోదావ‌రి-పెన్నా అనుసంధానంతో సోమ‌శిల‌, పెన్నా, కండ‌లేరు ఆయ‌క‌ట్టు స్థిరీకరణ చేస్తామని తెలిపారు. ఈనెల 11న గడ్కరీ పోలవరం ప్రాజెక్టును పరిశీలించనున్నారని చెప్పారు.