శ్రీనివాసమంగాపురంలోని శ్రీ కల్యాణ వేంకటేశ్వరస్వామివారి ఆలయంలో సాలకట్ల సాక్షాత్కార వైభవోత్సవాలు సోమవారం వైభవంగా ప్రారంభమయ్యాయి. ఈ ఉత్సవాలు మూడు రోజుల పాటు జరుగనున్నాయి. మొదటిరోజు ఆలయంలో ప్రత్యేక కార్యక్రమాలు నిర్వహించారు. 

ఇందులో భాగంగా ఉదయం సుప్రభాతంతో స్వామివారిని సుప్రభాతంతో మేల్కొలిపి తోమాలసేవ, కొలువు పంచాంగ శ్రవణం, సహస్రనామార్చన నిర్వహించారు. ఉదయం 9.00 నుండి 10.30 గంటల వరకు కల్యాణమండపంలో శ్రీదేవి, భూదేవి, సమేత శ్రీ కల్యాణ వేంకటేశ్వరస్వామివారి ఉత్సవర్లకు వేడుకగా స్నపనతిరుమంజనం నిర్వహించారు. ఇందులో పాలు, పెరుగు, తేనె, కొబ్బరినీళ్లు, పసుపు, చందనంలతో అభిషేకం చేశారు.

అనంతరం సాయంత్రం 6.00 నుండి 7.00 గంటల వరకు ఊంజల్సేవ జరుగనుంది. రాత్రి 7.00 నుండి 8.00 గంటల వరకు తిరుచ్చి వాహనంపై స్వామి, అమ్మవార్లు ఆలయ నాలుగు మాడ వీధుల్లో భక్తులకు దర్శనమివ్వనున్నారు. ఈ సందర్భంగా ఆలయంలో ఆర్జిత కల్యాణోత్సవంను రద్దు చేశారు. ఈ కార్యక్రమంలో టిటిడి స్థానిక ఆలయల ఉపకార్యనిర్వహణాధికారి వెంకటయ్య, ఏఈవో శ్రీనివాసులు, టెంపుల్ ఇన్స్పెక్టర్. ఇతర అధికారులు, విశేష సంఖ్యలో భక్తులు పాల్గొన్నారు.