నందమూరి తారక రామారావు బయోపిక్ ‘ఎన్టీఆర్’లో నటిస్తున్న బాలీవుడ్ నటి విద్యాబాలన్ తన పాత్ర తీరుతెన్నుల గురించి తెలుసుకోవడానికి నందమూరి కుటుంబీకులతో సమావేశం అవుతున్న సంగతి తెలిసిందే. సినిమాలో ఎన్టీఆర్ సతీమణి బసవతారకం పాత్ర చేస్తోంది విద్య. ఈ నేపథ్యంలో ఎన్టీఆర్ కుటుంబీకుల ద్వారా బసవతారకం గురించి తెలుసుకుంటోందామె. ఇందులో భాగంగా బాలయ్య భార్య, కూతురు,అల్లుడు తదితరులతో విద్యాబాలన్ ఫొటోలు దిగింది. ఈ సినిమాను ప్రతిష్టాత్మకంగా తీసుకుని రూపొందిస్తున్న బాలయ్య బాలీవుడ్ నటీనటుల ద్వారా ఈ సినిమాకు మరింత హైప్‌ను తీసుకొచ్చే ప్రయత్నం చేస్తున్నారు. అందులో భాగంగానే విద్యాబాలన్‌ను ఇందులో నటింపజేస్తున్నారు. ఈ సినిమాలో మరింతమంది ప్రముఖ నటీనటులు అగుపించే అవకాశం ఉంది. అందుకు సంబంధించిన పూర్తి వివరాలు ఇంకా వెల్లడి కావాల్సి ఉంది.