ఏపీకి ప్రత్యేక హోదా ఇవ్వడంతోపాటు విభజన హామీలను నెరవేర్చాలని డిమాండ్ చేస్తూ.. కేంద్రంపై టీడీపీ అవిశ్వాస తీర్మానం ప్రవేశపెడుతోంది. శుక్రవారమే సభలో అవిశ్వాసం చర్చకు రానుంది. బడ్జెట్ సమావేశాల సందర్భంగా వైఎస్ఆర్సీపీ ఎంపీలు అవిశ్వాస తీర్మానం నోటీసులిచ్చారు. కానీ ‘గందరగోళం’ కారణంగా సభ పదే పదే వాయిదా పడి, అది చర్చకు రాలేదు. ఇదంతా బీజేపీ గేమ్ ప్లాన్‌లో భాగమని విపక్షాలు అనుమానించాయి. కానీ వర్షాకాల సమావేశాలు ప్రారంభం కాగానే.. టీడీపీ స్పీకర్‌కి అవిశ్వాసం నోటీసులు ఇవ్వడం, దానికి అంగీకరించడం చక చకా జరిగిపోయాయి. దీంతో టీడీపీ, బీజేపీ కుమ్మక్కయ్యాయని వైసీపీ నేతలు విమర్శించారు. ఇదంతా పక్కనబెడితే.. అవిశ్వాసం తీర్మానం ద్వారా ఏపీకి ప్రత్యేక హోదాపై కేంద్రాన్ని నిలదీయాలని, తమతో కలిసి వచ్చే పక్షాలతో మోదీ సర్కారును ఇరుకున పెట్టాలనేది టీడీపీ వ్యూహం. ఎలాగో తీర్మానం వీగిపోతుందని తెలుసు.. కానీ ఏపీని బీజేపీ మోసం చేసిన విషయం జనాల్లోకి తీసుకెళ్లడమే టీడీపీ ప్రధాన ఉద్దేశం. అందుకే సమావేశాల ప్రారంభానికి ముందే బీజేపీ, కాంగ్రెస్సేతర పార్టీల నేతలను టీడీపీ ఎంపీలు కలిశారు. బడ్జెట్ సమావేశాల సమయంలో అవిశ్వాసానికి ససేమీరా అన్న మోదీ సర్కారు.. ఇప్పుడు సై అనడానికి కారణం ఏంటనేది చాలా మంది మదిని తొలుస్తున్న ప్రశ్న. దీనికి కారణాలు అనేకం. ఎలాగో అవిశ్వాసం నెగ్గదనే ధీమా మొదటి కారణం కాగా.. సభలో అవిశ్వాసం ప్రవేశపెట్టనీయకుండా మోదీ సర్కారు అడ్డుకుంటోందనే విపక్షాల ప్రచారానికి బ్రేకులేయడం రెండోది. ఇక మూడోది విపక్షాలను చీల్చడం. ఇప్పుడిప్పుడే మోదీకి వ్యతిరేకంగా ప్రతిపక్షాలు కలిసి పోరాడుతున్నాయి. పార్టీలన్నీ ఏకమై ఐక్యంగా పోరాడే ముందే.. విపక్షాలను దెబ్బకొట్టాలనే వ్యూహంతో బీజేపీ పెద్దలున్నారు. ఓటింగ్ సమయంలో ఎన్డీయేతర పక్షాలు కూడా తమకు అండగా నిలుస్తాయని లేదంటే ఓటింగ్‌కు దూరంగా ఉంటాయని బీజేపీ నేతలు భావిస్తున్నారు. ఎన్డీయేలో భాగం కాని టీఆర్ఎస్, అన్నాడీఎంకే, బీజేడీ లాంటి పార్టీలు తటస్థంగా ఉంటాయని కమలనాథుల అంచనా. ఆ దిశగానే ఆ పార్టీల అడుగులు పడుతున్నాయి కూడా. టీడీపీ ఎంపీలకు శివసేన అపాయిట్‌మెంట్ ఇవ్వకపోవడం.. తాజాగా అమిత్ షా ఉద్దవ్ థాక్రేకు ఫోన్ చేయడం వీటన్నింటిని ఆ కోణంలోనే అర్థం చేసుకోవాలి.స్పీకర్ కాకుండానే సభలో బీజేపీకి సొంతంగా 273 మంది ఎంపీలు ఉండగా.. ఎన్డీయే కూటమిలో 314 మంది సభ్యులున్నారు. పార్టీలను తటస్థంగా ఉంచడం ద్వారా 70 మంది ఎంపీలను ఓటింగ్‌కు దూరంగా ఉంచాలని బీజేపీ భావిస్తోంది. అంటే ఓటింగ్ జరిగితే.. మోదీ ఘన విజయం ఖాయమన్న మాట. అవిశ్వాసం పుణ్యామని.. మోదీ సర్కారు బలంగా ఉందనే ప్రచారాన్ని మరోసారి జనాల్లోకి తీసుకెళ్లడం, కొత్త మిత్రులను కూడగట్టుకోవడం అనేవి బీజేపీ ప్రధాన వ్యూహాలు. ముందస్తుకు మోదీ సిద్ధమవుతున్నాడనే ప్రచారం జరుగుతున్న తరుణంలో.. మరో దఫా సభలు జరగడానికి ఆస్కారం లేనట్టుగానే భావించాలి. జరిగినా నామమాత్రమే. కాబట్టి.. ఈ సమావేశాల్లోనే విపక్షాలను చెల్లాచెదురు చేయాలనే వ్యూహంతో బీజేపీ బరిలో దిగుతోంది.