నాలుగు రోజులుగా ఎగువ కురుస్తోన్న భారీ వర్షాలకు గోదావరిలో నీటి మట్టం ప్రమాదస్థాయికి చేరుకుంది. భద్రాచలం వద్ద శుక్రవారం ఉదయం 11 గంటలకు 47.5 అడుగులను తాకింది. అటు దవళేశ్వరం వద్ద కూడా గోదావరి నది ఉగ్రరూపం దాల్చింది. సుమారు 10 లక్షల క్యూసెక్కుల నీటిని సముద్రంలోకి వదులుతున్నారు. కోనసీమలోనూ గౌతమి, వశిష్ఠ, వైనతేయ నదులు ఉద్ధృతంగా ప్రవహిస్తున్నాయి. దీంతో గోదావరి పరిహాక ప్రాంత ప్రజలు భయాందోళనలకు గురవుతున్నారు. కోనసీమ ప్రజలు నాటు పడవల్లో ప్రయాణించవద్దని అధికారులు హెచ్చరించారు. దేవీపట్నం మండలంలో శీతవాగు పొంగి పొర్లుతోంది. విలీన మండలాల్లో శబరి నదికి ఎగువ పోటుతో వీఆర్‌పురం, చింతూరు, కూనవరం మండలాల్లో రహదారులపై వరద నీరు వచ్చి చేరింది. పోలవరం వద్ద గోదావరి నీటి మట్టం 12.31 మీటర్లుగా నమోదయ్యింది. మరి కొద్ది గంటల్లో 13 మీటర్లకు చేరుకుంటుందని అంచనా వేస్తున్నారు. పోలవరం కడెమ్మ వంతెనపై గోదావరి నీరు చేరుకుంటోంది. కొత్తూరు కాజ్‌వే పైకి ఐదు మీటర్లు ఎత్తున నీరు చేరుకోవడంతో 19 గిరిజన గ్రామాలకు పూర్తిగా రాకపోకలు నిలిచిపోయాయి. దీంతో అధికారులు ప్రత్యేక లాంచీల్లో నిత్యావసర వస్తువులను ఆ గ్రామాలకు పంపుతున్నారు. వరద నీరు పోటెత్తడంతో పోలవరం ప్రాజెక్టు పనులు తాత్కాలికంగా నిలిచిపోయాయి. పాత పోలవరం, కమ్మరిగూడెం, నూతనగూడెం, కొత్త పట్టిసీమ, గుటాల, తదితర గ్రామాల్లో గట్లు బలహీనంగా ఉండటంతో ఇసుక బస్తాలను అధికారులు సిద్ధం చేస్తున్నారు. మరోవైపు ఎగువ రాష్ట్రాల్లో కురిసిన వర్షాలకు కృష్ణమ్మ సైతం పరవళ్లు తొక్కుతోంది. దీంతో శ్రీశైలం జలాశయంలోకి వరద కొనసాగుతోంది. ప్రస్తుతం 3.11 లక్షల క్యూసెక్కులకు పైగా ప్రవాహం వచ్చి చేరుతోంది. శ్రీశైలం పూర్థిస్థాయి నీటి మట్టం 885 అడుగులు కాగా, ప్రస్తుతం 876.9 అడుగులకు చేరుకుంది. జలాశయంలో నీటి నిల సామర్థ్యం 215 టీఎంసీలు కాగా, ప్రస్తుతం 176 టీఎంసీలుగా ఉంది. అడుగులకు చేరుకుంది. లక్ష క్యూసెక్కుల నీటిని బయటకు పంపుతున్నారు. విద్యుత్ ఉత్పత్తి ద్వారా 79 వేల క్యూసెక్కులు నాగార్జున సాగర్‌కు విడుదల చేస్తుండగా మిగతాది పోతిరెడ్డుపాడు, హంద్రీనివా ప్రాజెక్టులకు విడుదల చేశారు.