వచ్చే ఎన్నికల్లో తమ పార్టీ గెలుపు పట్ల విశ్వాసం వ్యక్తం చేశారు వైఎస్సార్ కాంగ్రెస్ పార్టీ అధినేత జగన్ మోహన్ రెడ్డి. ఇంగ్లీషు చానెల్ కు ఇచ్చిన ఇంటర్వ్యూలో ఆయన మాట్లాడుతూ.. విజయం పట్ల విశ్వాసం వ్యక్తం చేస్తూ,అందుకు గల కారణాలను కూడా వివరించారు. ప్రజాసంకల్ప పాదయాత్రలో ఉన్న జగన్‌తో టీవోఐ చేసిన ఇంటర్వ్యూలోని ముఖ్యమైన అంశాలు ఇవి..ఆయన మాటల్లోనే.. గత ఎన్నికల్లో తెలుగుదేశం, వైఎస్సార్ కాంగ్రెస్ పార్టీకి పడ్డ ఓట్లలో తేడా కేవలం 1.5 శాతం. బీజేపీతో పొత్తు, పవన్ కల్యాణ్ మద్దతుతో చంద్రబాబు నాయుడు ఆ మాత్రం ఓట్లను పొందగలిగారు. ఇప్పుడు చంద్రబాబుకు బీజేపీ, పవన్ కల్యాణ్‌‌ల మద్దతు లేదు. అంతకు మించి చంద్రబాబు పాలనపై తీవ్రమైన ప్రజా వ్యతిరేకత నెలకొని ఉంది. గత ఎన్నికల ముందు రుణమాఫీని రైతులకు, డ్వాక్రా మహిళలకు ఆశ పెట్టారు. వాటిని అమలు చేయడంలో చంద్రబాబు దారుణంగా విఫలం అయ్యారు. దీంతో ఆయా వర్గాలు బాబుకు బుద్ధిచెప్పాలనే నిర్ణయానికి వచ్చాయి. పెట్టుబడులు రాబట్టినట్టుగా, ఉద్యోగాలను ఇచ్చినట్టుగా కూడా బాబు అబద్ధాలు చెబుతున్నారు. కేంద్రం బాగా సాయం చేస్తోందని అసెంబ్లీలో ధన్యవాద తీర్మానం చేసింది చంద్రబాబు నాయుడే. తన వైఫల్యాలకు ఎవరో ఒకరిని బాధ్యులుగా చేయడం చంద్రబాబు నైజం. అందుకే ఇప్పుడు బీజేపీ మోసం చేసిందని అంటున్నారు. ప్రధానమంత్రిగా నరేంద్రమోడీనా, రాహుల్ గాంధీనా.. అనే అభ్యంతరాలు మాకు లేవు. ఏపీకి ప్రత్యేకహోదా ఇచ్చే వారికే కేంద్రంలో భవిష్యత్తులో మేం మద్దతు పలుకుతాం. ఇందులో మరో ఆలోచనకు తావే లేదు. ప్రత్యేకహోదా ఏపీకి ప్రాణప్రదం. నేను రెండు సార్లు ఎంపీగా నెగ్గాను, నాలుగేళ్లుగా ప్రతిపక్ష నేతగా ఉన్నాను.. కుటుంబంతో కన్నా ప్రజలతోనే ఎక్కువ సమయం గడుపుతున్నా. పాలించడానికి ఇంతకన్నా ఇంకేం అనుభవం కావాలి? వచ్చే ఎన్నికల తర్వాత ఎవ్వరి మద్దతూ అవసరం లేకుండా వైఎస్సార్ కాంగ్రెస్ పార్టీ ప్రభుత్వాన్ని ఏర్పరచగలుగుతుంది. ప్రజలు ఈ మేరకు స్పష్టమైన తీర్పును ఇవ్వబోతున్నారు.