హిందీలో అమితాబ్ చేసిన సినిమా ఒకదాన్ని ఇది వరకే రీమేక్ చేశాడు అజిత్. బిగ్ బి యాంగ్రీ యంగ్‌మ్యాన్‌గా నటించిన ‘డాన్’ సినిమాను తమిళంలో కొన్నేళ్ల కిందట ‘బిల్లా’గా తీస్తే అందులో అజిత్ హీరోగా నటించాడు. ఆ సినిమా సూపర్ హిట్ అయ్యింది. అలా సూపర్ హిట్ వెంచర్ రీమేక్‌లో నటించిన అజిత్.. ఇప్పుడు మరోసారి బిగ్ బి సినిమా రీమేక్‌లో నటించబోతున్నట్టుగా వార్తలు వస్తున్నాయి. కొన్నాళ్ల కిందట హిందీలో వచ్చిన ‘పింక్’ ఎంత పెద్ద హిట్టో చెప్పనక్కర్లేదు. ఆ సినిమాలో అమితాబ్ ప్రధాన పాత్రలో నటించగా తాప్సీ తదితరులు ఇతర ముఖ్య పాత్రల్లో నటించారు. ఆ సినిమా సూపర్ హిట్ కావడమే గాక ప్రశంసలు కూడా పొందింది. ఈ నేపథ్యంలో దాన్ని తమిళంలో రీమేక్ చేయనున్నట్టుగా వార్తలు వస్తున్నాయి. ఈ రీమేక్ వెర్షన్లో అజిత్ ముఖ్య పాత్రలో నటించనున్నాడని, బిగ్ బి హిందీలో చేసిన పాత్రను తమిళంలో అజిత్ చేయబోతున్నాడని కోలీవుడ్ సమాచారం. అయితే పింక్ ను రీమేక్ చేయబోతున్నట్టుగా ఇంకా అధికారిక ధ్రువీకరణ ఏదీ రాలేదు. అజిత్ లాయర్ పాత్రలో నటించబోతున్నాడని ఆ సినిమా పింక్ రీమేక్ అని.. ‘థీరన్ అధికారం ఒండ్రు’ సినిమా దర్శకుడు వినోద్ పింక్ రీమేక్‌కు దర్శకత్వం వహించబోతున్నట్టుగా వార్తలు వస్తున్నాయి. దివంగత నటి శ్రీదేవి భర్త బోనీ కపూర్ ఈ తమిళ సినిమాకు నిర్మాతగా వ్యవహరించబోతున్నాడట. ఈ వార్తలన్నీ ఏ మేరకు నిజం అవుతాయో ముందు ముందు తెలుస్తుంది.