ధవళేశ్వరం భారీ వర్షాలు, ఎగువ ప్రాంతాల నుంచి వస్తోన్న వరద నీటితో గోదావరి ఉగ్రరూపం దాల్చింది. తూర్పు గోదావరి జిల్లాలోని ధవళేశ్వర బ్యారేజీ వద్ద నీటి మట్టం రూ.14.6 అడుగులకు చేరింది. శుక్రవారం ఉదయం మొదటి ప్రమాద హెచ్చరిక జారీ చేసిన అధికారులు.. శనివారం ఉదయం రెండో ప్రమాద హెచ్చరిక జారీ చేశారు. భారీ మొత్తంలో వరద ప్రవాహం వచ్చి చేరుతుండటంతో.. గేట్లు ఎత్తి 14 లక్షల క్యూసెక్కులకు పైగా నీటిని దిగువకు వదులుతున్నారు. ధవళేశ్వరం బ్యారేజీ గేట్లు తెరవడంతో.. లంక గ్రామాలకు ముంపు భయం పట్టుకుంది. కాజ్‌వేలు మునిగిపోవడంతో లంక గ్రామాలకు బాహ్య ప్రపంచంతో సంబంధాలు తెగిపోయాయి. రాకపోకల కోసం నాటు పడవలను ఆశ్రయిస్తున్నారు. భద్రాచలం వద్ద కూడా గోదావరికి భారీ వరద వచ్చి చేరుతోంది. వంతెన వద్ద నదీ మట్టం 44 అడుగులుగా ఉంది. ఒడిశా, ఛత్తీస్‌గడ్‌ల నుంచి వరద నీరు వచ్చి చేరుతుండటంతో.. శబరి నది ఉప్పొంగుతోంది. చింతూరు, వీఆర్ ‌పురం మండలాల్లో వరద నీరు రహదారులపై ప్రవహిస్తోంది. దీంతో గిరిజన గ్రామాలకు రాకపోకలు నిలిచిపోయాయి. ఏపీ-ఛత్తీస్‌గఢ్‌‌ రాష్ట్రాల మధ్య కూడా రాకపోకలకు ఆటంకం కలుగుతోంది. మహారాష్ట్ర, తెలంగాణలో కురుస్తున్న భారీ వర్షాల కారణంగా జయశంకర్‌ భూపాలపల్లి జిల్లా కాళేశ్వరం వద్ద గోదావరి ఉధృతంగా ప్రవహిస్తోంది. ఎల్లంపల్లి ప్రాజెక్టు గేట్లు ఎత్తడంతో కాళేశ్వరం వద్ద శుక్రవారం భారీగా పెరిగిన వరద ప్రవాహం.. శనివారం కొంత మేర తగ్గింది. గత రెండేళ్లతో పోలిస్తే.. కాళేశ్వరం వద్ద ఈ ఏడాది వరద ప్రవాహం ఎక్కువగా ఉంది. సాగ‌ర్ ఆయ‌క‌ట్టు రైతుల‌కు ప్ర‌భుత్వం శుభ‌వార్త‌