సరైన సినిమా ఏదీ పోటీలో లేకపోవడం.. సినిమా విడుదలకు ముందే ఏర్పడిన విపరీతమైన క్రేజ్.. విడుదల తర్వాత వచ్చిన పాజిటివ్ టాక్.. ఇవన్నీ కలిసి ‘గీతగోవిందం’ సినిమా వసూళ్లను సంచలన స్థాయికి తీసుకెళ్తున్నాయి. పెట్టిన పెట్టుబడితో పోలిస్తే.. ఎన్నో రెట్ల లాభాలను సంపాదించుకుంటోంది ఈ సినిమా. ఇప్పటికే భారీ వసూళ్లను సాధించిన ఈ సినిమా ఇప్పుడు అరవై కోట్ల రూపాయల షేర్ వసూళ్ల దిశగా పరుగులు తీస్తోందని ట్రేడ్ వర్గాలు చెబుతున్నాయి. గీతగోవిందం మరీ ఇంత స్థాయి వసూళ్లను సాధిస్తుందని ఎవ్వరూ ఊహించలేదు. అర్జున్ రెడ్డి తర్వాత విజయ్ దేవరకొండ ఫుల్ లెంగ్త్ రోల్‌లో నటించిన సినిమాగా ఈ సినిమా ఆసక్తిని రేకెత్తించింది. ఈ సినిమా ఆడియో విడుదల అయిన దగ్గర నుంచి ఆ క్రేజ్ అనేక రెట్లు పెరుగుతూ వచ్చింది. విడుదల సమయానికి భారీ హైప్ వచ్చింది.అంచనాలను వంద శాతం అందుకుంది ‘గీతగోవిందం’. భారీ ఓపెనింగ్స్‌తో పాటు.. ఆ తర్వాత కూడా అదే కలెక్షన్ల ధాటి కొనసాగుతూ ఉండటం గమనార్హం. గీతగోవిందం తర్వాత పలు సినిమాలు వచ్చాయి. నిన్న కూడా రెండు మూడు సినిమాలు విడుదల అయ్యాయి. అయితే వాటికి రివ్యూయర్ల నుంచి పాస్ మార్కులు కూడా పడటం లేదు. దీంతో ‘గీతగోవిందం’కు మరింత రన్ లభిస్తోంది. 14 కోట్ల రూపాయల బడ్జెట్‌తో రూపొందిన సినిమా 70 కోట్ల రూపాయల షేర్ సాధిస్తుండటం అంటే మాటలు కాదు. ఈ వసూళ్లకు డిజిటల్, శాటిలైట్ రైట్స్ అదనం. ఓవరాల్‌గా ఈ సినిమా ఈ ఏడాదిలోనే మోస్ట్ ప్రాఫిట్స్ సాధించిన సినిమాగా నిలవడం ఖాయం.