కాంగ్రెస్-టీడీపీ పొత్తు.. తెలుగు రాష్ట్రాల్లో చర్చనీయాంశంగా మారిన అంశం. ఈ రెండు పార్టీలు కలిసి పనిచేయబోతున్నాయని.. రాబోయే ఎన్నికల్లో రెండు పార్టీలు పొత్తు పెట్టుకోబోతున్నాయనే జోరుగా ప్రచారం సాగుతోంది. అయితే ఏపీ మంత్రులు, టీడీపీ నేతలు మాత్రం పొత్తు లేదు గిత్తూ లేదని కొట్టిపారేస్తున్నారు. ఇదే అంశంపై టీడీపీ ఎంపీ జేసీ దివాకర్ రెడ్డి తాజాగా చేసిన వ్యాఖ్యలు ఆసక్తికరంగా మారాయి. అమరావతిలో సీఎం చంద్రబాబును కలిసిన తర్వాత జేసీ మీడియాతో మాట్లాడారు. తాజారాజకీయాలతో పాటూ తెలంగాణలో ముందస్తు ఎన్నికలు.. టీడీపీ-కాంగ్రెస్ పొత్తు అంశంపై తనదైన శైలిలో స్పందించారు. తెలంగాణలో టీడీపీ బలహీనంగా ఉందని.. అందుకే కాంగ్రెస్ పార్టీ టీడీపీ మద్దతు కోరుతుందన్నారు జేసీ. తెలంగాణలో ప్రభుత్వం ఏర్పాటు చేసే పరిస్థితి తెలుగు దేశంకు లేదని..కాంగ్రెస్కి మద్దతిస్తే తప్పులేదన్నారు. ఏపీలో మాత్రం పొత్తు పెట్టుకోవడం మంచిదికాదని అభిప్రాయపడ్డారు. బీజేపీని నాలుగేళ్లు నమ్మి మోసపోయామని.. అధికారంలోకి వస్తే కాంగ్రెస్ ఏదో చేస్తామంటోంది కాబట్టి.. వారిని నమ్మి చూస్తే తప్పేమీ లేదన్నారు. నమ్మినవాడు ఎప్పుడు చెడిపోడని ఆయన వ్యాఖ్యానించారు. పొత్తుల విషయంలో ఎన్టీఆర్ నాటి పరిస్థితులు వేరు.. ఇప్పటి పరిస్థితులు వేరన్నారు. తెంగాణలో ముందస్తు ఎన్నికలపైనా స్పందించారు జేసీ. ముస్లింలు దూరమవుతారనే ఆందోళనతోనే కేసీఆర్ ముందస్తు ఎన్నికలకు వెళుతున్నారని వ్యాఖ్యానించారు. అంతేకాదు పార్లమెంట్ ఎన్నికల్లో బీజేపీతో టీఆర్ఎస్కు పొత్తు ఉంటుందని వ్యాఖ్యానించారు. అయితే కేంద్రంలో అధికారం మారితేనే పోరాటలకు ఫలితం ఉంటుందని జేసీ అన్నారు. ఓవైపు మంత్రులు, కొంతమంది పార్టీ నేతలు కాంగ్రెస్తో పొత్తును వ్యతిరేకిస్తుంటే.. జేసీ మాత్రం సానుకూలంగా మాట్లాడటం చర్చనీయాంశమయ్యింది.