28 ఏళ్ల మ‌న్‌జీత్ సింగ్ ఆసియా క్రీడ‌ల్లో స్వ‌ర్ణం గెలిచారు. త్వ‌ర‌లో 29వ ఏట అడుగు పెట్ట‌నున్న ఈ అథ్లెట్ సాధించిన ఈ ఘ‌న‌త‌ ఏముందిలే అని తీసి పారేసే విష‌యం కాదు. మ‌రో స్వ‌ర్ణం దేశానికి సాధించి పెట్టాడు అని ప‌క్క‌న‌పెట్టే వార్త‌ కాదు. ప్ర‌తి ఒక్క‌రూ తెలుసుకోవాల్సిన స్ఫూర్తి పాఠం. ఆఖ‌రి క్ష‌ణాల్లో అద్భుతంగా పుంజుకున్న మ‌న్‌జీత్ పురుషుల 800 మీట‌ర్ల ప‌రుగులో స్వ‌ర్ణ ప‌త‌కాన్ని చేజిక్కుంచుకున్నాడు.నిజానికి రేసు ఆరంభానికి ముందు వ‌ర‌కూ కూడా అత‌డిపై పెద్ద‌గా ఆశ‌లు లేవు. కాంస్య‌మైన సాధిస్తాడ‌ని ఎవ‌రూ ఊహించ‌లేదు. క్రీడాభిమానులంద‌రి దృష్టిలో 800మీ పరుగులో అందరి దృష్టిలోనూ ఫేవరెట్‌ జిన్సన్‌ జాన్సనే. కానీ అద్భుత ప్రదర్శన చేసిన మన్‌జీత్‌.. జిన్సన్‌ జాన్సన్‌ను రెండో స్థానానికి పరిమితం చేశాడు. చివ‌రి 100 మీట‌ర్ల ప‌రుగులో అత‌డు చూపిన వేగం చూప‌రుల‌ను క‌ట్టిపడేసింది. ప్ర‌స్తుత ఆసియా క్రీడ‌ల‌కు ముందు ఒక్క అంత‌ర్జాతీయ పోటీలోనూ మ‌న్‌జీత్ ప‌త‌కాన్ని గెల‌వ‌లేదు. జాతీయ స్థాయిల్లోనూ గ‌డిచిన ఐదేళ్ల‌లో ఎటువంటి టైటిల్ గెలిచింది లేదు. ఒకప్పుడు అతడి ప్రతిభను కాంట్రాక్టు ఉద్యోగంలో చేర్చుకున్న‌ ఓఎన్‌జీసీ, అత‌డి ప్ర‌తిభ స‌రిగా లేని కార‌ణంగా ఈ ఏడాది మార్చిలో అతడిని ఉద్యోగం నుంచి తొల‌గించింది. మంజీత్‌ ప్రదర్శన ఏమం గొప్పగా లేకపోవడంతో అతడి వల్ల సంస్థకు ఒనగూరుతున్న ప్రయోజనం ఏమీ లేదని తేల్చేసి, ఉపకార వేతనం ఆపేసింది. మంజీత్‌కు పెళ్లయి బిడ్డ పుట్టబోతున్న సమయంలో ఎదురైన పరిస్థితి ఇది. ఇలాంటి స్థితిలో ఆటపై మనసు లగ్నం చేయడం ఎంత కష్టమో వివ‌రించ‌డం ఏ క్రీడాకారుడికైనా వర్ణ‌ణాతీతం. ఈ స్థితిలో అత‌డికి కుటుంబ సభ్యులు, కోచ్‌ అమ్రిష్‌ అండగా నిలిచారు. ఏప్రిల్లో కామన్వెల్త్‌ క్రీడలకు అర్హత సాధించలేకపోయినా.. మంజీత్‌ ఆత్మవిశ్వాసం కోల్పోలేదు. ఆసియా క్రీడల బెర్తు సాధించాడు. అంతర్‌ జిల్లా అథ్లెటిక్స్‌లో రెండో స్థానం సాధించాడు. ఆ టోర్నీలో జాతీయ రికార్డుతో స్వర్ణం సాధించిన జిన్సన్‌ మీదే ఆసియా క్రీడల్లో ఎక్కువ అంచనాలున్నాయి.